Ndryshimi i formulës së Superiores, ku titulli kampion do të vendoset me anë të “Final 4”, një fazë “play off”-i, ku pas 36 javësh, katër ekipet e para do të përballen mes tyre me një takim dhe grumbullim pikësh, ka bërë që disa ish-futbollistë të famshëm të kampionatit shqiptar të mendojnë ndryshe.
Në një postim në portalin e “Panorama Sport”, shohim komentin e Përparim Daiut, i cili shprehet se kjo formulë nuk është e drejtë, pasi një ekip që udhëheq 36 javë, mund të humbasë titullin:
“Formulë që nuk i shërben as cilësisë dhe as ndershmërisë e as kampionatit, i cili ka veçori tjetër nga Kupa…
I humbet rëndësia klasifikimit dhe normal ai që udhëheq me të drejtë kampionatin në 36 ndeshje mund ta humbasë atë për 3 ndeshje, aq më shumë, hiqet specifika, sepse kampionatin gjithmonë e fiton më i forti, kurse Kupën me specifikën e eliminimit jo gjithmonë e fiton ekipi më i fortë.
Ndaj, urgjentisht ekipet që pretendojnë të dalin kampione duhet ta ndryshojnë këtë skemë, ku çdo lloj skenari apo aleance do të jetë katastrofë në përfundim”.
Gjithashtu Skerdi Bejzade, ish-sulmuesi i njohur i kampionatit shqiptar, i cili ndër ekipet që ka përfaqësuar janë Partizani, Vllaznia apo Elbasani, ka komentuar në të njëjtin postim në lidhje me ndryshimin e skemës dhe shtimin e kësaj faze.
Bejzade ironizon duke thënë se që tani e tutje të gjitha vendet e tjera do të kopjojnë skemën e kampionatit shqiptar.
Ai në komentin e tij thekson se është për rritjen e numrit të skuadrave në elitë, ku t’u jepet më shumë mundësi ekipeve me traditë që të luajnë mes më të mirave.
“Këtë formulë do ta bëjnë të gjitha vendet europiane tani se është e paparë. Kthejeni dhe bëjeni me 14 skuadra, të futen sërish edhe ekipet me traditë si Flamurtari, Elbasani dhe të tjera, se na mbytët me ekipe katundesh”, përfundon Skerdi Bejzade./PanoramaSport
Discussion about this post