Një episod i ngjashëm me atë të ndodhur rreth një vit më parë në Fushë-Krujë, ku shtëpitë e banorëve u dëmtuan nga shpërthimet e një guroreje në pronësi të një prej anëtarëve të fisit famëkeq Rraja, është përsëritur në Dimal.
Banorë të fshatit Pashalli janë ankuar te autoritetet se një gurore që operon në zonë, me atë të shpërthimeve, u ka dëmtuar banesat.
Zyrtarisht, policia lokale njoftoi nisjen e një procedimi penal për rastin dhe marrjen në hetim të administratorit të subjektit privat, por pa përcaktuar akuzën apo akuzat penale të ngritura. “Stacioni i Policisë Dimal referoi materialet në Prokurori ku nisi procedimi në gjendje të lirë për shtetasin A.Ç., 51 vjeç, banues në Fier, administrator i një subjekti për nxjerrjen dhe përpunimin e inerteve (gurore), në fshatin Pashalli, pasi dyshohet se më datë 21.09.2024, në subjektin e tij, janë kryer shpërthime me lëndë plasëse dhe si pasojë janë dëmtuar disa banesa në këtë fshat”, thuhet në një njoftim të Policisë së Beratit, shpërndarë për mediat këtë të hënë.
Policia u tregua hermetike lidhur me dhënien e informacioneve të mëtejshme për rastin, duke refuzuar të zbardhë se për cilën firmë bëhet fjalë pas një interesimi të “Gijotina.com”, apo të zbulojë identitetin e personit nën hetim.
Megjithatë, mësohet se shtetasi i proceduar është Adrian Caushaj, i cili sipas të dhënave në Qendrën Kombëtare të Biznesit (QKB) rezulton administrator i “Magnus” shpk.
Firma la leje mjedisore për aktivitetin
Të tjera informacione të pasqyruara në QKB zbulojnë se “Magnus” është nën pronësi të “GENERAL BETON”, kompani kjo e zotëruar me 100% të kuotave nga Gramos Caushaj.
“Magnus” rezulton e regjistruar rishtazi në QKB, konkretisht më 20/05/2024 dhe si objekt ka kryesisht aktive në fushën e turizmit. Ajo që vihet re është që mungon pasqyrimi nga firma e objektit të aktivitetit në fushën e gërmimeve.
Sipas legjislacionit në fuqi, që një kompani të kryejë aktivitetin e gurores (gërmime) nevojitet të pajiset me leje të posaçme që jepet nga institucionet e linjës nën varësi të Ministrisë së Mjedisit dhe leja pasqyrohet në të dhënat e Qendrës Kombëtare të Biznesit.
Këto të dhëna tregojnë se “Magnus” nuk e disponon një lejë të tillë.
Ndryshe nga “Magnus”, firma mëmë “GENERAL BETON”, rezulton të jetë e pajisur me leje mjedisore të thjeshtë dhe të llojit B – që përfshin të drejtën për të ushtruar aktivitetin e guroreve, referuar ligjit Nr. 10.448, datë 14.7.2011, “Për Lejet e Mjedisit”.
Të dyja kompanitë rezultojnë në shkresat e depozituara në regjistrin e bizneseve me të njëjtën seli qendrore, me vendndodhje te “Kthesa e Patosit”.
Firma mëmë e suksesshme në ‘biznesin’ e tenderave
“GENERAL BETON” rezulton të jete përfituese në dhjetëra raste të procedurave tenderuese.
Sipas të dhënave nga portali i specializuar “Open Data”, nga viti 2017 deri në 2024-ën, “GENERAL BETON” ka përfituar mbi 630 milion lekë në tendera (62 340 100 Lekë) nga qeverisja vendore.
Shumës i shtohen 6 134 340 Lekë të përfituara në një tender të fituar në bashkëpunim me një tjetër firmë nga Bashkia Roskovec për rikonstruktimin e një rruge, si dhe 8 tendera nga ndërmarrjet publike me vlerë totale 26 793 700 Lekë.
Shumë nga këto procedura mbajnë shenjën e “Flamurit të Kuq”, ç’ka tregon se risqet për korrupsion në lidhjet e këtyre kontratave kanë rrezik të lartë korrupsioni.
Discussion about this post