Gjermania do të kalojë dimrin me guxim dhe forcë pavarësisht rreziqeve për mungesa të gazit. Kështu ka deklaruar kancelari gjerman Olaf Scholz duke nisur një sulm ndaj politikës energjetike të CDU-së së paraardhëses së tij Angela Merkel.
“Jemi në një situatë ku mund të themi se do ta kalojmë këtë dimër, pavarësisht nga të gjitha tensionet, falë përgatitjeve që kemi bërë, të cilat askush nuk mund t’i garantonte tre, katër, pesë muaj më parë”, tha kancelari gjerman para parlamentit, i cili sot filloi shqyrtimin e buxhetit të vitit 2023.
“Ne jemi sot në një pozicion për ta përballuar këtë dimër me guxim dhe forcë dhe për të siguruar që vendi ynë ta kalojë atë”, vazhdoi kancelari socialdemokrat.
Pasardhësi i Merkelit u shpreh gjithashtu i bindur se Gjermania është në gjendje të angazhohet në rrugën drejt së ardhmes, pasi ka marrë vendime të rëndësishme, më të rëndësishme se ato të marra gjatë dekadave të fundit.
Këto vendime po japin fryte, vijoi ai, duke iu referuar kryesisht numrit të planeve të ndërtimit për terminalet e importit të gazit të lëngshëm natyror (LNG).
Duke adoptuar një ton agresiv, kancelari gjerman kritikoi politikat energjetike të qeverive konservatore CDU-CSU, të cilat kanë çuar në mbështetjen e tepërt të Gjermanisë në gazin natyror të importuar nga Rusia.
“Koalicioni konservator, i cili ishte në pushtet nga viti 2005 deri në vitin 2021, mbart përgjegjësinë e plotë për faktin se Gjermania mori vendimet për t’u larguar nga qymyri dhe energjia bërthamore, pa pasur kurrë fuqinë për t’u angazhuar për asgjë, as për të promovuar zhvillimin e energjisë së rinovueshme”, tha Olaf Solz.
Olaf Solz, popullariteti i të cilit po bie në sondazhet e opinionit, akuzoi rivalët e tij politikë se fshihnin të vërtetën se Gjermania duhet të rriste prodhimin e energjisë elektrike me 600 deri në 800 teravat deri në fund të dekadës, kur ata ishin në pushtet.
Discussion about this post