Michel Platini është rikthyer të flasë për Juventusin, një klub në të cilin francezi ka lënë gjurmë të jashtëzakonshme. Në një intervistë për “Tuttosport”, legjenda e bardhezinjve jep recetën për drejtuesit që të ringrejnë edhe një herë skuadrën në nivelin e duhur teksa mohon se ai do të jetë presidenti i ri i torinezëve.
Sipas ish-futbollistit prestigjioz, Juventus duhet të tregohet dinake në merkato dhe të gjejë lojtarët e duhur me kosto të ulët, ashtu siç bën Borussia Dortmund.
“Unë president i Juventus? Nuk ma kanë kërkuar kurrë, dhe nuk mendoj se do të ma kërkojnë në këtë moment. Tani është koha që klubi të ringrihet së pari në aspektin ekonomik dhe më pas në atë sportiv. Nuk është ky momenti për të ëndërruar, megjithatë do të vijë edhe kjo kohë.
Është gjithmonë çështje cikli, Juventus është në një periudhë të vështirë, por do të rikthehet të fitojë ashtu siç ka bërë gjithnjë. Drejtuesit e Juventus duhet të tregohen pak dinak, kostot e futbollistëve janë rritur shumë. Mbappe nuk mund të vijë te Juventus, ndaj në merkato duhet zgjuarsi ashtu siç bën Dortmundi”, u shpreh Platini.
Discussion about this post