Dinamo e Tiranës nuk ka probleme me dëmtimet në prag të ndeshjes së javës së parë të Abissnet Superiores me Tiranën, që luhet të dielën në stadiumin “Elbasan Arena”.
Të gjithë futbollistët janë të gatshëm për trajnerin Luigi di Biagio, i cili ka mundësinë të zgjedhë formacionin më të mirë për “Derbin e Madh të Kryeqytetit”.
Prej pak ditësh me blutë po stërviten edhe dy lojtarët më të rinj, mesfushori Fatjon Andoni dhe sulmuesi Veton Tusha.
Sa i takon formacionit të mundshëm të Dinamos në derbin e së dielës, vetëm mesfusha ka dilema. Situata në mbrojtje dhe në sulm është pak a shumë e qartë.
Në portë do të jetë Rexhepi, kurse para tij Albion Marku në të djathtë, Hoxha dhe ish-i i bardhebluve, Behiratçe në qendër ndërsa Indrit Prodani do luajë në të majtë.
Në sulm pritet të luajë treshja e përbërë nga Zabërgja majtas, Lorenco Vila djathtas dhe Kaçorri në qendër.
Në mesfushë i sigurt për momentin duket braziliani Lorran, kurse dy të tjerët mund të jenë Andoni dhe Denison, me këtë të fundit ndoshta pak më të avancuar. Megjithatë, situata mund të ndryshojë deri të dielën.
Discussion about this post