Janë luajtur sot dy ndeshje të vlefshme për javën e 9-të të Kategorisë së Parë. Dinamo është rikthyer te fitorja, teksa ka mposhtur me lehtësi 2-0 Turbinën në stadiumin “Selman Stërmasi”, ndërsa në Burrel ndeshja midis skuadrës vendase dhe Apolonisë është mbyllur në barazim 1-1.
45 minutat e para në ndeshjen në kryeqytet u mbyllën me rrjeta të paprekura, 0-0. Pas pushimit, epërsia e bluve të kryeqytetit, sidomos pas daljes jashtë me karton të kuq të Brahjes (71’) së Turbinës, u kontretizua me dy gola. Goli i parë për ekipin e Dinamos, të drejtuar nga Nevil Dede u shënua nga një 19-vjeçar, Alisio Preloshi (83’), i cili shënoi një eurogol me roveshatë. Goli i dytë erdhi në minutat shtesë, sërish nga një supergol, me anë të Prodanit (90’+6).
Me këtë triumf, fitore skuadra e Dinamos ngjitet përkohësisht në vendin e parë në kuotën e 18 pikëve, ndërsa cërrikasit me këtë humbje mbajnë sërish vendin e fundit në tabelën e renditjes me 5 pikë të grumbulluara.
Në ndeshjen e luajtur në stadiumin “Liri Ballabani” të Burrelit, skuadra vendase nuk mundi të ruante epërsinë e golit të shënuar nga Stana (69’). Miqtë fierakë arritën të barazonin në 1-1 me anë të Gjatës (88’), duke rrëmbyer një pike të vlefshme në fushën matjane. Aktualisht Burreli dhe Apolonia ndajnë vendet nëntë dhe dhjetë në renditje me nga 10 dhe 9 pikë respektivisht.
Të hënën e 7 nëntorit, në orën 16:00 në qytetin e Korçës do të luhet edhe super-sfida Skënderbeu-Flamurtari, e cila do të plotësojë edhe javën e 9-të të Kategorisë së Parë. Flamurtari me 17 pikë pozicionohet në vendin e dytë, ndërsa Skënderbeu 12 pikë dhe me dy ndeshje më pak renditet në vendin e gjashtë.
Discussion about this post