Dinamo nuk ia doli dot që të sigurojë objektivin historik siç ishte kualifikimi në grupet e Conference League, pasi u mposht nga Pafosi në Qipro në ndeshjen e kthimit me rezultatin e përgjithshëm 4-2. Ndonëse ekipi i Superiores dha gjithçka në fushë për ta çuar sfidën drejt penalltive, rivalët qipriotë u treguan më cinikë në rastet për shënim, duke i dhënë fund rrugëtimit të dinamovitëve në Kupat e Evropës.
Pas përfundimit të ndeshjes, ka patur gjithashtu një reagim nga ana e presidentit të klubit, Ardian Bardhi, i cili shprehet se për mënyrën se si Dinamo është paraqitur në fushën e lojës meriton vetëm respekt dhe mirënjohje. Presidenti Bardhi përmend shpirtin e garës dhe përkushtimin e treguar në çdo ndeshje nga lojtarët dhe se pikërisht këta luftuan deri në fund, besuan dhe dhanë maksimumin për fanellën e Dinamos.
Në fund, numri “një” i klubit shton se me mbylljen e një kapitulli hapet një tjetër po kaq i rëndësishëm siç është edhe kampionati në “Abissnet Superiore”, aty ku kërkon përmbushjen e një objektivi të madh, rikthimin e Dinamos në podium, pra titullin kampion.
Deklarata
Faleminderit, Dinamo!
Rrugëtimi ynë europian përfundoi, por ajo që kjo skuadër tregoi në fushën e lojës meriton vetëm respekt dhe mirënjohje.
Dua të falënderoj të gjithë futbollistët për paraqitjet, shpirtin e garës dhe përkushtimin e treguar në çdo ndeshje. Luftuan deri në fund, besuan dhe dhanë maksimumin për fanellën e Dinamos.
Një falënderim i veçantë shkon për stafin teknik, për punën, profesionalizmin dhe gjithçka dha gjatë këtij rrugëtimi europian. Së bashku kaluam tre ture dhe shkuam shumë pranë një arritjeje historike.
Ky rrugëtim duhet të na bëjë më të fortë dhe më të bindur për atë që mund të arrijmë së bashku.
Tani mbyllim kapitullin europian dhe gjithë energjinë tonë e drejtojmë te kampionati.
Dinamo ka një objektiv të madh përpara: të luftojë për t’u rikthyer aty ku i takon – te titulli kampion.Vazhdojmë së bashku. Me besim, punë dhe ambicie.
Forca Dinamo!
Discussion about this post