Dinamo ka triumfuar në transfertë përballë Skënderbeut në sfidën e kthimit të çerekfinales së Kupës së Shqipërisë. Pasi ishte mposhtur 0-2 në ndeshjen e parë, sot dinamovitët triumfuan 0-4, duke shkuar në gjysmëfinale.
Koha e rregullt përfundoi 0-2 në favor të skuadrës të Ilir Dajës, me autogolin e Nasto dhe golin e shënuar nga Mandela. Kjo bëri që sfida të shkonte në shtesën e madhe 30 minutëshe.
Te Skënderbeu paraqiteshin sot me shumë lojtarë zëvendësues dhe nga ekipi i të rinjve. Por blutë nuk ia dolën të përfitonin siç pritej nga kjo situatë edhe pse me titullarët për të mbyllur vetë kualifikimin.
Blutë nuk dinin të shënonin para portës dhe ndonëse gjetën avantazhin me një autogol, nuk shënuan gola të tjerë për të hapur plotësisht kualifikimin deri në shtesë, kur Skënderbeu kishte mbetur me 10 lojtarë dhe kur mbrojtja korçare thuajse nuk ishte në fushë me gabimet e njëpasnjëshme.
Kjo bëri që ndeshja të shkonte me shtesa ku më pas vazhdoi i njëjti trend i dhuratave nga prapavija e korçarëve, që solli golat e Qardakut dhe Zabërgjës për të siguruar kualifikimin pa ngjyrë të Dinamos në gjysmëfinale.
Kështu, dinamovitët bëhen gjysmëfinalistët e katërt, pas Partizanit, Vllaznisë dhe Egnatias. Për të vendosur çiftet gjysmëfinaliste do të hidhet shorti.
Discussion about this post