Tirana kërkon të sigurojë kualifikimin që në ndeshjen e parë. Skuadra nënkampione do të përballet me Dinamo Batumin në orën 20:00 në “Air Albania” në ndeshjen e vlefshme për turin e parë në Ligën e Konferencës.
Edhe dje binte në sy presidenti Refik Halili. Numri një stolit bardheblu pa nga afër stërvitjen e skuadrës së tij. Jo vetëm kaq, por presidenti ka qëndruar deri në mbrëmje kur mbaroi stërvitja dhe më pas u largua për darkën zyrtare.
Trajneri Orges Shehi edhe dje u mor gjatë, sidomos me anën taktike. Trajneri punoi me skemat se si skuadra duhet të shkojë te goli dhe se si duhet të komportohet në situata të veçanta. Arma pritet të jetë shpejtësia e ekipit.
Nëse Tirana arrin të kalojë Dinamo Batumin, në turin e dytë do të përballet me gjigandët e Besiktasit. Tirana mund të themi se ka fat ndaj skuadrave gjeorgjiane. Në dy përballje të mëparshme të bardhebluve me ekipet nga vendi i Stalinit, skuadra shqiptare është kthyer me kualifikim, por gjithmonë në Champions League. Në fillim, Tirana është kualifikuar në sezonin 2003-2004 ndaj Dinamos së Tbilisit. Në sezonin 2020-2021 të Europës, Tirana shkroi historinë brenda në Tbilisi, teksa mundi dhe eliminoi në një ndeshje teke Dinamo Tbilisin 2-0. Atë vit Tirana shkoi deri në “play off”-in e Europa League-s./PanoramaSport
Discussion about this post