Prezenca e OSBE-së në Shqipëri ka reaguar në lidhje me lëvizjen e grave deputete të mazhorancës dhe opozitës, të cilat janë bërë bashkë dhe kanë depozituar një amendament për projektin e ndryshimeve të Kodit zgjedhor.
Ky amendament ka si qëllim që të garantojë kuota zgjedhore. Sipas amendamentit, 1 në 3 nga kandidatët fitues nga lista e hapur duhet të jetë grua.
Në reagim thuhet se OSBE çmon përparimin e jashtëzakonshëm në fushën e barazisë gjinore që ka bërë Shqipëria gjatë viteve të fundit, veçanërisht për pjesëmarrjen dhe përfaqësimin e grave në jetën politike.
“Prezenca e OSBE-së në Shqipëri çmon përparimin e jashtëzakonshëm në fushën e barazisë gjinore që ka bërë Shqipëria gjatë viteve të fundit, veçanërisht për pjesëmarrjen dhe përfaqësimin e grave në jetën politike.
Ne mirëpresim përpjekjet aktuale ndërpartiake, të drejtuara nga gratë deputete, dhe shpresojmë që ndryshimet në Kodin Zgjedhor të garantojnë pozitën udhëheqëse të Shqipërisë në rajon e më gjerë në lidhje me përfaqësimin gjinor në parlament”, thuhet në reagim.
Kujtojmë që ky reagim vjen në kohë kur në Kuvend po diskutohen ndryshimet në Kodin Zgjedhor.
Discussion about this post