Xhudistja kosovare, Distria Krasniqi ka fituar medaljen e argjendtë në ‘Grand Prix Upper Austria 2025’ në kategorinë deri 52 kilogramë, pasi u mposht në finale nga xhudistja japoneze Iroha Oi.
Distria e kishte nisur në mënyrë të përkryer garën për medalje në Linz Grand Prix, duke fituar në raundin e dytë, pasi të parin e kaloi pa luftë. Në raundin e dytë, xhudistja pejane ishte më e mirë se kundërshtarja amerikane, Jenna Schurr, duke e mposhtur me ippon.
Pas kësaj fitoreje, Distria u kualifikua në çerekfinale të kategorisë deri në 52 kilogramë, ku aty u përball me serben Nikolina Nisavic.
Xhudistja jonë e kaloi edhe këtë pengesë me sukses, duke arritur fitore ndaj kundërshtares serbe brenda 25 sekondash çka bëri që ajo të sigurojë kalimin në gjysmëfinale.
Në gjysmëfinale, u ndesh me hungarezen Reka Pupp, të cilën gjithashtu e mposhti me ‘waza-ari’ pa shumë vështirësi për të arritur në finalen e madhe.
Në finale Distria nuk pati fat duke u mposhtur brenda pak sekondave me ‘Ippon’ nga xhudistja japoneze.
Discussion about this post