Në ditën ndërkombëtare të HIV/AIDS, presidenti Ilir Meta ka kërkuar reflektim mbi nevojën e përmirësimit të vazhdueshëm të kujdesit shëndetësor, ndërsa kujton jetët e humbura nga kjo sëmundje e rëndë.
Meta shkruan në Facebook se edukimi dhe ndërgjegjësimi i të rinjve, është i nevojshëm për të luftuar paragjykimet dhe diskriminimin.
“Në Ditën Botërore kundër HIV/AIDS kujtojmë jetët e humbura prej saj në vendin tonë, për të reflektuar mbi nevojën e përmirësimit të vazhdueshëm të kujdesit shëndetësor. Me rëndësi mbetet edukimi cilësor dhe ndërgjegjësimi, sidomos i të rinjve, për të minimizuar jo vetëm përhapjen, por edhe luftuar paragjykimet dhe diskriminimin, që bëhen pengesë për shërbimet e parandalimit dhe trajtimit”, shkruan Meta.
Të dhënat e publikuara në vendin tonë flasin për një numër të lartë të infektuarish ndër vite. Raportohet se që nga viti 1993, në Shqipëri janë regjistruar 1500 persona të prekur nga HIV-AIDS. Vetëm këtë vit janë regjistruar 91 raste, nga 81 raste që ishin vitin e kaluar. Meshkujt vijojnë të përbëjnë përqindjen më të madhe të rasteve të prekura.
Discussion about this post