Përshkallëzohet situata në fshatin Baks-Rrjoll të Velipojës, ku për të tretën ditë me radhë banorët po protestojnë kundër ndërtimit të një resorti turistik në zonë. Gjatë përplasjes me forcat e policisë, një nga protestuesit ka rënë në tokë në gjendje të rënduar shëndetësore, duke u dukur pa ndjenja.
Ngjarja ka ndodhur mes tensioneve dhe shtyrjeve mes protestuesve dhe efektivëve, ndërsa në momentin kur qytetari është rrëzuar, pranë tij ndodheshin vetëm gazetarë dhe banorë të tjerë. Asnjë punonjës policie nuk është afruar menjëherë për t’i dhënë ndihmën e parë.
Pavarësisht thirrjeve të menjëhershme për ndihmë, autoambulanca nuk u shfaq në vendngjarje, duke shkaktuar zemërim dhe panik mes të pranishmëve. Banorët pohojnë se kishin telefonuar urgjencën prej rreth një ore, por pa asnjë përgjigje. Kjo vonesë e pashpjegueshme dhe e paprecedentë, veçanërisht kur ngjarja po transmetohej drejtpërdrejt, ngre pikëpyetje serioze mbi funksionimin e shërbimit të urgjencës në qytetin e Shkodrës.
Në mesin e zërave të protestuesve, u hodhën dyshime se spitali mund të ketë probleme edhe me furnizimin me karburant për autoambulancat. Në mungesë të personelit mjekësor, ndihma e parë për qytetarin në gjendje të rëndë shëndetësore u dha nga deputeti i Partisë Demokratike, Kliti Hoti, i cili është me profesion mjek dhe ndodhej në protestë. Edhe pse forcat e Policisë së Shtetit ishin të pranishme për të menaxhuar protestën, ishte ndërhyrja e deputetit ajo që ofroi asistencën e parë jetike.
Banorët e Baks-Rrjollit kanë paralajmëruar përshkallëzim të protestës, përfshirë bllokimin e rrugëve dhe një tubim para dyerve të SPAK. Ata kundërshtojnë projektin që, sipas tyre, rrezikon rreth 80 banesa dhe pretendojnë se pronat po u merren në mënyrë të padrejtë për t’i hapur rrugë ndërtimit.
Një nga protestuesit deklaroi se kundërshtimet do të jenë të pandalshme derisa çështja e pronësisë të zgjidhet. Ai drejtoi akuza ndaj qeverisë, duke përmendur kryeministrin Edi Rama dhe ministren e Infrastrukturës Belinda Balluku si përgjegjës për firmosjen e projektit, si dhe akuzoi biznesmenin Bashkim Ulaj.
Protestuesit i kanë bërë thirrje edhe kryebashkiakut të Shkodrës, Benet Beci, që të ndërhyjë për zgjidhjen e situatës, duke theksuar se disponojnë dokumente ligjore dhe vendime gjyqësore për pronat e tyre.
Discussion about this post