Vijon sot në ditën e saj të tretë, protesta e prindërve dhe nxënësve në fshatin Grizë të Patosit, për prishjen e shkollës së fshatit.
Mësohet se, edhe sot, banorët kanë ndaluar autobusin që kanë ardhur për të marrë nxënësit për shkuar në shkollën e qytetit. Ata u shprehën se dje pasdite Kryetarja e Bashkisë dhe kryeplaku i fshatit i kanë thënë që të shkojnë në Patos se shkolla do të bëhet nga e para.
Bashkia do t’i dërgojë fëmijët në një shkollë në Patos, me justifikimin se ky institucion ka pasur plasaritje në mure si shkak i tërmetit të 26 nëntorit. Në të vërtetë, shkolla do të kthehet në klub argëtimi për pensionistët, duke u privatizuar.
Banorët shprehen të sigurt se fëmijët nuk do t’i dërgojmë në Patos, dhe kërkojnë që shkolla në Grizë të riparohet dhe të mos mbyllet.
“Duam t’i shikojmë fytyrën asaj zonjës kryetare se nuk e kemi parë kurrë, dhe sot në mëngjes ka ardhur kryeplaku done të gënjente fëmijët. Ne si prindër nuk i heqim fëmijët, jemi lagje e Patosit, nuk jemi periferi me 2 a 3 nxënës. Shkolla jonë ka 65 nxënës, me gjithë kopshtin, shkolla nuk ka ato çarje që mund të prishet fare, nuk duam të mbyllet, jemi dakord për riparimin, ta bëjmë, po jo të prishet apo mbyllet shkolla”, tha njëri nga banorët.
Në fshatin Grizë të Patosit, janë 46 nxënës që ndjekin studimet në shkollë fillore, ndërsa 22 fëmijë që ndjekin parashkollorin.
