Sot, në Ditën Ndërkombëtare të Fëmijëve, presidenti i vendit Ilir Meta ka bërë një thirrje për institucionet përgjegjëse që garantojnë sigurinë e tyre. Përmes një postimi në Facebook, Meta kërkon që të forcohet më shumë ligji për mbrojtjen e fëmijëve. Sipas tij, kur vjen fjala për fëmijët deputet duhet të lënë me një anë garat politike dhe të bashkëpunojnë për të bërë më të mirën.
“Sot, në Ditën Ndërkombëtare të Fëmijëve, i nxis të gjithë aktorët institucionalë të ndërmarrin nisma konkrete ligjore, që garantojnë për çdo fëmijë shqiptar të drejtën e jetës, si e drejtë e patjetërsueshme, mbrojtjen e shëndetit dhe nga çdo forme abuzimi, edukim dhe arsim cilësor, si dhe një fëmijëri të lumtur dhe të sigurt, për të jetuar të lirë në një shoqëri në paqe, ku mbizotërojnë vlerat më të larta njerëzore dhe kombëtare. Inkurajoj Kuvendin e Republikës së Shqipërisë dhe çdo deputet, për të miratuar nismat e duhura, në veçanti për mbrojtjen dhe parandalimin e abuzimeve dhe krimeve ndaj fëmijëve, duke parashikuar ndëshkimin më të ashpër ligjor”, shkruan ai.
Sakaq, Meta iu kërkon institucioneve rregulluese dhe atyre të rendit që të zbatojnë me përpikmëri ligjin për mbrojtjen e fëmijëve, pasi është detyra e tyre të garantojnë një jetë më të mirë dhe të sigurt për të gjithë fëmijët në vend. U bëj thirrje institucioneve përgjegjëse të zbatojnë me rigorozitet kuadrin ligjor ne fuqi, duke mundësuar zbatimin e programeve konkrete për garantimin e mirëqenies dhe të një mjedisi të sigurt për çdo fëmijë. Asnjë fëmijë shqiptar nuk meriton të përjetojë ndjenjën e frikës apo më keq akoma, të dhunës. Është detyra e të gjithëve t’i mbrojmë, që të rriten të shëndetshëm, të sigurt dhe të mirëedukuar”, tha ai. Sipas tij, një fëmijëri e lumtur, është bazë për një shoqëri të shëndoshë dhe plotësisht europiane në të ardhmen.
Discussion about this post