Ish-ministri i Jashtëm, Ditmir Bushati, shprehet se Shqipëria po mbahet peng i mosmarrëveshjes ndërmjet Bullgarisë dhe Maqedonisë së Veriut. Bushati thotë në një postim në ‘Facebook’ se ky është rasti më absurd në historinë e politikës së zgjerimit të BE-së. Ndër të tjera, ish-ministri shprehet se është dyfish i padrejtë qëndrimi që po i mbahet i Shqipërisë për procesin e integrimit, për shkak të bllokimit të paarsyeshëm që i po i bëhet Maqedonisë së Veriut.
“Shqipëria po mbahet si kolateral i mosmarrëveshjes ndërmjet Bullgarisë dhe Maqedonisë së Veriut, duke shënuar rastin më absurd në historinë e politikës së zgjerimit të BE-së. Edhe pse në kuadër të përçimit të mesazhit politik dhe kontekstit gjeopolitik do të ishte një sinjal inkurajues ulja njëkohësisht e Shqipërisë dhe Maqedonisë së Veriut në tryezën e bisedimeve për anëtarësim në BE, është dyfish i padrejtë ‘ndëshkimi’ i Shqipërisë për shkak të bllokimit të paarsyeshëm që i po i bëhet Maqedonisë së Veriut. Gjetja e konsensusit brenda radhëve të BE-së për hapjen e grup kapitujve të çështjeve të mjedisit (cluster 4) me Serbinë, në të njëjtë dite me mospërcaktimin e datës për zyrtarizimin e bisedimeve me Shqipërinë dhe Maqedoninë e Veriut, ngjan më tepër si një politikë kompensuese për të mbuluar dështimin me procesin e zgjerimit”, Shkruan ai. Në përfundim ai shprehet se BE, nuk duhet të zvarrisë më çështjen pasi po zhgënjen shqiptarët dhe qytetarët e Ballkanit.
Discussion about this post