Karim Benzema i trembi të gjithë në miqësoren me Bullgarinë, kur iu desh të linte fushën e lojës në minutën e 41-të për shkak të një dëmtimi, që në pamje të parë krijoi idenë e lamtumirës së Europianit.
Më pas u qartësua më shumë situata dhe rreziku i madh fatmirësisht u shmang. Deschamps fillimisht u shpreh se nuk është dëmtim serioz dhe tashmë flet vetë Benzema, që tregon se është stërvitur me ekipin dhe ndihet 100% gati.
“Gjithçka po shkon mirë, dje isha në gjendje të stërvitesha me grupin. Shkoi mirë, pa dhimbje dhe shqetësime të tjera, kështu që jam gati për lojë. Jam 100% gati”, tha Benzema. Pas dy ditësh Franca sfidon Gjermaninë në “Allianz Arena” dhe sulmuesi i Real Madrid pritet të jetë në fushë.
