Një ngjarje tragjike u regjistrua mbrëmjen e djeshme në Dropull të Gjirokastrës ku një çift i moshuar humbën jetën pasi banesa e tyre u përfshi nga flakët.
Irakli dhe Fotini Panajoti ishin viktimat në fjalë, përkatësisht 84 dhe 73 vjeç, ndërsa shefi i zjarrfikësve Dropull, Alqi Kosta ka thënë për “Report Tv” se shkak i zjarrit dyshohet të ketë qenë bombola e gazit.
“Në orën 9:30 morëm njoftimin për djegien e banesës. Pesë zjarrfikës, të cilëve iu bashkova dhe unë, u nisëm për në vendngjarje, por terreni i keq vonoi mbërritjen për të shuar flakët. Kur shkuam pamë ndërtesën dykatëshe që po digjej dhe kishim informacione që brenda ishin dy të moshuar. Banesa ishte me çati dërrase dhe dysheme dërrase. Nga ekspertiza e parë u evidentua që gatuanin me bombol gazi dhe shkaku kryesor i zjarrit dyshohet se ka qenë bombola e gazit. Bombola e gazit u gjet jashtë shtëpisë, dyshohet se ka pasur rrjedhje gazi”, thotë ai.
Dy të moshuarit jetonin vetëm, ndërsa fatkeqësisht nuk mundën t’i shpëtonin flakëve që i përpinë shtëpinë.
Discussion about this post