Të tjera detaje janë zbuluar rreth djegies së automjetit në Korçë. Ka qenë vetë pronari i mjetit, ai i cili jashtë kamerave është shprehur se ngjarja është aksidentale. Kjo është në mospërputhje me përfundimin e grupit hetimor, i cili bënte me dije se ngjarja ishte e qëllimshme. Hysni Bezati, pronari i automjetit, ka deklaruar se rreth orës 23:00 të mbrëmjes ka shkuar në një lokal, ndërsa automjetin e kishte parkuar fare pranë. Më tej, dyshon se ka harruar ndezur cigaren brenda në makinë, në momentet që i është drejtuar lokalit. Kur ka parë automjetin, ai ishte përfshirë i gjithi nga flakët, e më pas ka njoftuar policinë.
Më tej Bezati ka bërë me dije se nuk ka konflikte e shkaku i vetëm mbetet bishti i cigares i lënë ndezur.
“Nuk kam konflikte, jam këtu me banorët e fshatit e po diskutojmë. Makina më iku nga duart për një bisht cigareje, që e lashë ndezur”, ka deklaruar pronari i mjetit.
