Shtëpisë së Klodian Çalamanit, autorit të vrasjes makabre të 8-vjeçarit Mateo Vasia, iu vu flaka gjatë natës së 25 nëntorit. Ndonëse banorët deklaruan se nuk kanë parë e dëgjuar asgjë, u hodhën hipoteza se shkak i zjarrit ishte një shkëndijë elektrike. Por në fakt a ishte vërtetë kjo arsyeja?
Pas dëshmive të të afërmeve të Mateos se Klodian Çalamani nuk ka vepruar i vetëm por ka pasur bashkëpunëtorë, hetuesit u rikthyen në shtëpinë ku ndodhi krimi për të parë edhe një herë më detaje se çfarë ka ndodhur në këtë shtëpi. Evidentuan dhe morën çdo gjurmë pasi qetësia e Çalamanit dhe dëshmia e tij se e kreu krimin pasi Mateo e kishte fyer nuk ishte bindëse. Nga ana tjetër, shtëpia fantazmë e krimit u vizitua nga shumë persona të cilët përpiqeshin të kuptonin se si ka ndodhur ngjarja.
Rikthimi i familjarëve të Mateos në banesën e Klodian Çalamanit të cilët dëshpërimisht kontrollonin gjithçka në përpjekje për të gjetur një provë të vetme për të zbardhur ngjarjen hedh dyshime të forta se zjarri në shtëpinë e autorit të krimit makabër është i qëllimshëm. Vështirë të besohet se ka pasur një shkëndijë elektrike në banesën e braktisur të 39-vjeçarit Klodian Çalamani.
“Në fshatin Grecalli, Fier, ka marrë flakë dhe është djegur pjesërisht banesa e shtetasit Klodian Çalamani, 39 vjeç. Grupi hetimor po punon për përcaktimin e shkaqeve të rënies së zjarrit”, sqaroi shkurtimisht pa dhënë asnjë detaj më tepër lidhur me këtë ngjarje.
Mateo Vasia u vra në mënyrë makabre nga fqinji i tij paraditen e 16 nëntorit. Pas denoncimit të nënës, Florindës, forcat e rendit u vunë në lëvizje. Kamerat e sigurisë në zonë zbuluan momentet e fundit të 8-vjeçarit, i cili kishte pedaluar në rrugët e lagjes me biçikletën e atij që do të bëhej vrasësi i tij. Policia ka ushtruar kontrolle në banesën e 39-vjeçarit Klodian Çalamani, i cili jetonte i vetëm në banesë pas divorcit të prindërve. Trupi i pajetë i vogëlushit është gjetur i groposur në kopshtin e shtëpisë së autorit të dyshuar të krimit, i mbuluar me baltë. Policia tha gjithashtu se djali 8-vjeçar është goditur me kazmë në kokë, çka ka sjellë vdekjen e të miturit.
Discussion about this post