Nëna e Melisa Trëndafilit, Ana Sino, ka reaguar për herë të parë pas ngjarjes tragjike ku bashkëshorti i vajzës së saj tentoi ta digjte të gjallë. Sino, e cila është aktualisht në spital, ka shprehur frikën e saj dhe shqetësimin për sigurinë e saj dhe të fëmijëve të saj, duke theksuar se ndjehet e pambrojtur nga autoritetet.
Ajo ka shpjeguar se ndonëse ka marrë kujdes të veçantë në spital dhe ka falënderuar Ministrinë e Shëndetësisë për mbështetje, ajo ndjehet e pasigurt për shkak se dhëndri i saj është ende në kërkim. Sino ka shprehur shqetësimin se ndonjë ngjarje e ngjashme mund të ndodhë përsëri, pasi nuk ka ndonjë mbrojtje efektive nga policia.
“Normale që kam frikë. Unë kam marrë me vete fëmijët se për sa kohë ai e bëri këtë mund të bëjë edhe të tjera. Unë kam 5 ditë këtu, duhet një kujdes për ata fëmijë. Po shikon ndonjë polic të më mbrojë mua? Kujdesi i spitalit është i veçantë, ka ardhur ministria e shëndetësisë, e falenderoj, vajzës i bëhet kujdes special, e falenderoj, por nga ana tjetër nuk ka një polic. Unë nuk kam ndonjë kujdes nga shteti. Unë shtetit i kërkoj që ai të kapet e të marr dënimin e merituar, se ne jetojmë me frikë,” – tha Ana Sino për Euronews Albania.
Sino gjithashtu ka shprehur dëshirën që dhëndri i saj të kapet sa më shpejt, duke kërcënuar se nëse do të ishte ajo që do ta gjejë, do ta ndëshkonte në të njëjtën mënyrë që ai e bëri me vajzën e saj.
“Më kanë marrë më kanë pyetur shef e operator, mua ça më pyet unë po ta di ku është fshehur e vras vet. Prandaj arrijmë në vetëgjyqësi. Unë po e gjeta do i bëj të njëjtën gjë që i bëri vajzës sime. Unë po ta di ku është do ta them ty? Vete e vras vetë unë,” – tha Ana Sino.
Discussion about this post