Pas përfundimit të komisionit hetimor të inceneratorëve, kryetarja e Komisionit, Jorida Tabaku deklaroi pas seancës ku dëshmoi kryeministri Edi Rama, se ai ka firmosur me vetëdije koncensionet e dhëna për impiantet e përpunimit të mbeturinave. Në një prononcim për mediat, ajo deklaroi se janë hedhur 430 mln euro për inceneratorët me dijeni dhe mbrojtje të plotë nga kryeministri Edi Rama.
“Komisioni e kishte të qarta faktet. Por sot doli në pah fakti që firma e kryeministrit Edi Rama është hedhur me vetëdije. Mbrojtja që ai bëri sot nuk është mbrojtje e rastësishme. Ka pasur qëllimin që t’ia jepte kontratën konçensionare 3 kompanive pa asnjë eksperiencë dhe kapital në bankë. Ka pasur dijeni që ka firmosur, pa pasur besim të plotë tek ato që kanë çuar tek vendimet e Këshillit të Ministrave. E di që nuk incenerohet, nuk kryhet procesi që janë projekte në letër edhe që bëhet për pastrim paratë. Sot e gjithë propaganda e tij ishte si i keni mbushur mendjen shqiptarëve që janë vjedhur 430 mln euro. Dhe këtë nuk arriti ta zhbënte sado që u mundua. Pasi e vërteta është e pamundur të fshihet. E vërteta gjithmonë del dhe sot nuk ka shqiptar që të mos e besojë që janë dhënë 3 konçensione personave në kërkim, 430 mln euro me dijeninë e plotë të Edi Ramës. Ajo që është më e rëndësishme, është të kuptojnë shqiptarët se jemi të vendosur ta çojmë deri në fund” – tha Tabaku.
Discussion about this post