“Do të ketë gjakderdhje”/ Banorët e “5 Majit në protestë: Rama, ky Putin i poshtër

Banorët e “5 Majit”, të Laprakës, Paskuqanit dhe Kodrës së Priftit kanë dalë sot sërish në protestë për të kundërshtuar shembjen e banesave të tyre.  Ata kanë kërkuar që paratë e banesave të shkojnë në llogaritë e tyre teksa kanë thënë se nuk kanë qenë kundër këtij projekti.  Por, theksojnë se bashkia paraqet tjetër projekt për marrëveshje dhe në terren vepron ndryshe.  Më tej njëri prej banorëve u bëri thirrje shqiptarëve të sensibilizohen dhe tu bashkohen protestës së tyre, ashtu siç bën për Ukrainën.

“Kemi protestuar që më datë 4 shtator. Kemi qenë një javë para te ARRSH për mënyrën e procedimit, na tha se s’ka asnjë lloj veprimi deri sa të nis dëmshpërblimi. Kanë shkuar punonjësit e IKM të lirojnë banesat. Ajo çfarë ndodh në terren është e kundërta. U kanë dhënë afat, e kanë nisur nga bizneset, pa asnjë lloj shkrese zyrtare, që ti paraqesim. Qytetarët e Tiranës duhet të ishin këtu , mos të shkojnë vetëm për Ukrainën. Dikujt po i shembet banesa e miqve, familjarëve etj. Këta njerëz duhet të ishin këtu, të mos bëhen më shumë ukrainas se ata vetë. Është e turpshme, shpresoj të ketë sensibilizim, janë 5 mijë familje që preken”, u shpreh një banor.

Ata kanë thënë që do i mbrojnë me çdo kusht banesat. Madje, njeri prej tyre paralajmëroi se do të derdhet gjak, ndërsa e krahasoi Ramën me Putin, duke thënë se kryeministri po vret popullin e tij dhe po zbaton një regjim komunistë.

“Na lini të qetë në shtëpitë tona, na corientuat me keq se lufta, na lini në shtëpiat tona, bukë s’kemi, ju na qitni edhe përjashta. Ku do shkojmë, nga 2005 presim legalizimin, 17 vite ku e gjeti ky njëri të më thotë që jam ilegal. Ilegal është Edi Rama i pari, babai ka lënë kockat për këtë Shqipëri, ka qenë partizan, babai i Edi Ramës ka qenë diktator, ka vrarë njerëz midis Kukësit e Tiranës. Ky lloj qeni, ky Putini poshtër, është më keq se Putini. Do të iki si më keq Ahmet Zogu , do e pësoj si ai”, u shpreh një banor tjetër. Banorët protestojnë prej muajsh, por pavarësisht rezistencës së tyre, Bashkia Tiranë vazhdon t’u shemb banesat.