Një incident ka ndodhur në Podgoricë të Malit të Zi, ku një qytetar shqiptar është ndaluar nga policia vendase për një shpejtësi 22 km/h mbi normën e lejuar.
Sipas denoncimit, shqiptari është shoqëruar në komisariat, ku i është thënë se procedura do të zgjaste vetëm një orë. Megjithatë, situata ka marrë një kthesë tjetër kur i është bërë e qartë se ai duhet të qëndronte në komisariat deri në orën 19:00, duke e mbajtur atë dhe familjen e tij “peng” për shtatë orë.
Qytetari, i cili ishte në tranzit për të shkuar në Itali, ka denoncuar se policia malazeze ka treguar sjellje të hapur raciste, madje edhe duke e kërcënuar se do e hidhnin nga ballkoni, kur shqiptari kërkonte sqarime të mëtejshme. Sipas tij, qëndrimi i policisë është i pajustifikueshëm, veçanërisht duke marrë parasysh faktin se bëhet fjalë për një shkelje relativisht të vogël trafiku.
“Të mbash një familje deri në orën 19:00 për vetëm 22 km/h mbi shpejtësinë e lejuar është racizëm,” shkruan qytetari, duke apeluar për ndërhyrje nga autoritetet shqiptare për të garantuar sigurinë dhe të drejtat e qytetarëve shqiptarë në këtë vend.
Discussion about this post