Kukësi përballet nesër me Bylisin në shtëpi, në një ndeshje që do të luhet pa praninë e publikut. Trajneri Enkeleid Dobi foli sot para mediave dhe fillimisht u ndal te fitorja e parë, ndaj Laçit javën e shkuar.
“Kemi marrë sinjale pozitive, por kemi shumë për të dhënë dhe nuk duhet të ndalojmë tani. Pas ndeshjes ndaj Laçit, që ishte shumë e rëndësishme, duhet vazhdimësi. Po nuk pate stabilitet bie poshtë. Fokusohemi të marrim ndeshjet, pasi e dimë se ku jemi. Jemi ende në të kuqe dhe nuk jemi komfort t’i lejojmë vetes gabime. Ka gjëra pozitive”.
“Me gjithë respektin për Bylisin, jemi të angazhuar në maksimum. Nuk ka kundërshtar të lehtë ose të fortë. Nuk kemi ne ndikim si luan Bylisi, por kemi ndikim si luajmë ne. Bylis vjen si favorit sepse vjen nga vendi i tretë dhe ne në vendin e tetë.
Duhet ta respektojmë dhe ta marrim me seriozitet. Një fjalë e urtë thotë: Nëse doni që t’ju respektojnë të tjerët, fillimisht respektoni veten tuaj. Duhet të jemi me këmbë në tokë dhe me përulësi sepse e dimë situatën ku jemi dhe nuk mund të bëjmë gjysmë ndeshje, por të minimizojmë gabimet”.
“Mungesa e tifozëve? Është e qartë që na mungojnë, sepse për to luhet. Për një gabim të dikujt ndodhin, por realisht nuk duhet të ndodhin. Duhet të fitojmë ndeshjet për t’i dhënë kënaqësi tifozëve për të mos krijuar situata të tilla për të cilën ka reaguar edhe klubi. I bëjmë thirrje të gjithëve që kemi nevojë për tifozët sepse luhet për Kukësin. Kemi penalizim, sepse donim që lojtari i 12-të të na mbështeste”, deklaroi Dobi.
Discussion about this post