Dodaj dhe Delaj bëjnë të buzëqeshë Vllazninë, 3 gola në Shkodër thyejnë Laçin

Vllaznia ka marrë tre pikë shumë të rëndësishme ndaj Laçit me fitoren 2-1 në Shkodër, duke konsoliduar edhe më shumë pozitat në katërshen e parë në një moment ku dëmtimet kanë përgjysmuar skuadrën shkodrane.

Kësaj të fundit i mungonte i gjithë reparti i mbrojtjes në ndeshjen e sotme për shkak dëmtimesh, ndërsa të tjerë iu shtuan në pjesën e parë me Deliun e të riun Spahija që u detyruan të linin fushën për shkak problemesh fizike.

Megjithatë, gjithçka e zgjidhën në pjesën e dytë dy talentet vendas, Dodaj e Delaj, të cilët shënuan në portën e Dajsinanit duke i dhënë një avantazh të dyfishtë shkodranëve. Bullari rihapi ndeshjen për miqtë, të cilët u hodhën në sulm me shumë forca në fund. Por rezultati nuk ndryshoi më dhe për Vllazninë erdhën tre pikë që e çojnë më të qetë drejt ndeshjes së fundit të këtij viti në Superiore.

Kevin Dodaj vazhdon të shënojë me rregullsi me Vllazninë dhe ka blinduar vendin në formacionin titullar të shkodranëve.

“Jam shumë i lumtur për lojën e ekipit, shumë i lumtur për tre pikët se ishte e domosdoshme ta fitojmë. Ia dolëm. Për mungesat, jemi të gjithë njëlloj, luajnë vetëm 11, ky është futbolli, ia dolëm.

Objektivi personal? E kam thënë edhe më parë, kërkoj numra dyshifrorë. Shpresoj t’ia arrjj.

Kam marrë shumë minuta deri tani dhe ndjehem mirë, nuk kam stres si në ndeshjet e para. Luaj me Bekim Balajn dhe më duket shumë e lehtë që të jem protagonist”, tha Dodaj për RTSH pas ndeshjes.

Vllaznia kryeson kampionatin me 31 pikë dhe në ndeshjen tjetër do të sfidojë Partizanin. Laçi i vendit të tetë pret Tiranën.

Trajneri i Laçit, Françesko Moriero, ka theksuar se ekipi tij bëri mirë në ndeshjen ndaj Vllaznisë dhe vetëm dy gabime individuale dënuan skuadrën e tij.

“Nuk kemi bërë asgjë të gabuar, kemi luajtur ndeshjen ballëhapur, për fat të keq erdhën dy gola për pavëmendje tonat. Pranohen humbjet, edhe pse mund të bënim diçka më shumë. Por e pranojmë rezultatin, me keqardhje, por e pranojmë.

Nuk ishte rënie psikologjike, e pësuam dy gola, njërin shpejt ndërsa tjetrin për një gabim individual. Por në futboll mund të ndodhë një gabim. Ajo që më interesonte ishte sjellja e skuadrës e cila ka luajtur gjithmonë me kokën lart. Iu afruam edhe barazimit, humbjet e bëjnë të rritet një skuadër”, tha Moriero.

gijotina.com/