Në dëshminë e tyre për Maska.al, punonjësit drejtojnë akuza ndaj zëvendësdrejtorit të Përgjithshëm të Doganave, Erald Delilaj, duke deklaruar se ai ndërhyri për të bllokuar procedurën e hetimit dhe se për lirimin e automjetit u paguan 50 mijë euro. Sipas tyre, autoboti u mbajt i bllokuar për katër ditë në Morinë dhe më pas u lejua të vijonte rrugën, pa u marrë masa për parregullsitë e konstatuara.
Ky denoncim vjen pas materialeve të publikuara më herët nga Maska.al, ku ndaj Delilajt janë ngritur akuza për presione ndaj bizneseve, ndërhyrje në kontrollet doganore dhe përfitime të dyshuara të paligjshme. Këtë herë, burimet janë punonjës të vetë administratës, të cilët flasin edhe për presionin që, sipas tyre, ushtrohet ndaj atyre që refuzojnë të zbatojnë urdhra për ndërprerjen e kontrolleve.
Autoboti me naftë në Morinë, parregullsitë dhe katër ditë bllokim
Në materialin e vënë në dispozicion të Maska.al, rasti identifikohet përmes praktikës së tranzitit me numër 5271, datë 28.08.2026, për autobotin me targa AB739ZH / 05413XC, i nisur nga Dega e Doganës Durrës me destinacion përfundimtar Kosovën.
Mjeti transportonte gasoil. Pronar i naftës ishte shtetasi kosovar Burim Veliu, ndërsa drejtues i autobotit ishte Vjonis Bujari.
Sipas të dhënave të përcjella në redaksinë tonë, Departamenti Operativ Hetimor, nëpërmjet Sektorit të Monitorimit, kishte njoftuar Drejtorinë e Hetimit për këtë transport. Gjatë kontrollit nga shërbimet doganore dhe grupi i shoqërimit të antikontrabandës tokësore në Morinë, u konstatuan parregullsi në elementët e sigurisë, konkretisht te plumbçet me numrat 26ALP1103185 dhe 26ALP1103186.
Pra, një transport ndërkombëtar nafte rezultonte me probleme në elementët e sigurisë doganore, çka kërkonte verifikimin e ngarkesës dhe të gjithë itinerarit të saj.
Por ajo që punonjësit denoncojnë për Maska.al lidhet me zhvillimet pas këtij konstatimi.
Ata shprehen se, pasi u vu në dijeni për rastin, Erald Delilaj ndërhyri në procedurë, bllokoi vijimin e hetimit dhe thirri në zyrë drejtuesin e autobotit, Vjonis Bujari.
Në dëshminë e tyre, punonjësit deklarojnë se për mbylljen e çështjes është dhënë një shumë prej 50 mijë eurosh. Sipas tyre, pavarësisht parregullsive të konstatuara, autoboti u mbajt katër ditë në Morinë dhe më pas u la i lirë të vijonte drejt Kosovës.
Një tjetër element që ngrenë denoncuesit është mungesa e masave pas konstatimit të shkeljes. Ata kërkojnë të verifikohet se çfarë ndodhi me procedurën e kontrollit dhe mbi çfarë baze u vendos lirimi i automjetit.
Ku përfunduan procesverbalet? Doganierët kërkojnë verifikimin e dokumentacionit
Në denoncimin e tyre, punonjësit ngrenë pikëpyetje mbi mënyrën se si u administrua rasti i autobotit. Sipas tyre, një mjet i konstatuar me parregullsi në plumbçet doganore nuk mund të lirohej pa u sqaruar plotësisht rrethanat e transportit dhe përgjegjësitë për shkeljen.
Ata kërkojnë që të verifikohet procesverbali i konstatimit, dokumentacioni i praktikës së tranzitit, vendimmarrja për bllokimin dhe lirimin e autobotit, si dhe komunikimet mes strukturave doganore dhe drejtuesve përgjegjës.
Pyetjet që kërkojnë përgjigje janë konkrete: A u dokumentuan të gjitha parregullsitë? A u verifikua nëse kishte pasur shkarkim të naftës përpara mbërritjes në destinacion? Kush e autorizoi lirimin e automjetit dhe përse nuk u morën masa të tjera?
Urdhra për të ndalur kontrollet dhe për të grisur procesverbalet
Por denoncimi i mbërritur në Maska.al nuk ndalet te rasti i autobotit në Morinë.
Punonjësit flasin edhe për ndërhyrje të vazhdueshme në punën e specialistëve të kontrolleve aposteriore. Ata shprehen se Erald Delilaj u ka kërkuar individualisht specialistëve të ndërpresin verifikimet kur konstatojnë shkelje, të tërhiqen nga kontrollet dhe të mos vijojnë me procedurat administrative.
Sipas dëshmisë së tyre, në raste të caktuara, pasi specialistët evidentojnë parregullsi, u kërkohet të mos ndërmarrin veprime të mëtejshme. Denoncuesit thonë se drejtuesit marrin më pas përsipër komunikimin me pronarët e bizneseve dhe se procesverbalet e kontrolleve janë anuluar apo grisur.
Punonjësit kërkojnë që institucionet të marrin në shqyrtim të gjitha kontrollet e kryera gjatë pesë muajve të fundit, duke krahasuar konstatimet e specialistëve me vendimet përfundimtare dhe dokumentacionin e administruar.
Shkarkohet Ilir Mino, doganierët lidhin largimin me refuzimin e një urdhri
Një tjetër episod i përmendur në denoncimin për Maska.al lidhet me largimin nga detyra të Ilir Minos, drejtuesit të sektorit të kontrolleve aposteriore.
Punonjësit shprehen se Mino u shkarkua pak ditë më parë, pasi nuk pranoi të zbatonte një urdhër të Erald Delilajt për anulimin e një kontrolli në Morinë.
Ata i referohen një shkrese zyrtare, për të cilën kërkojnë të verifikohet përmbajtja, arsyet e largimit të Minos dhe lidhja e mundshme me urdhrin për ndërprerjen e kontrollit.
Sipas denoncuesve, ky rast nuk është i izoluar, por pjesë e një klime ku specialistët që konstatojnë shkelje përballen me presion për të mos vijuar procedurat.
“Kemi frikë të flasim”, denoncuesit: Na kërcënojnë me transferime
Në fund të denoncimit të tyre për Maska.al, punonjësit shprehen se janë të terrorizuar nga situata brenda administratës doganore dhe se kanë frikë të identifikohen publikisht.
Ata thonë se çdo kundërshtim ndaj urdhrave të drejtuesve mund të pasohet me transferime në pika të largëta doganore ose me masa të tjera administrative.
“Ky është vetëm një rast, por nuk na bëhet më të punojmë si doganierë. Jemi të terrorizuar dhe kemi frikë të shprehemi hapur, sepse menjëherë na çojnë në pika të largëta”, shprehen punonjësit në denoncimin e përcjellë në redaksinë tonë.
Ata kërkojnë hetimin e rastit të autobotit me naftë në Morinë, verifikimin e shumës prej 50 mijë eurosh, shqyrtimin e dokumentacionit doganor dhe kontrollin e të gjitha procedurave aposteriore të pesë muajve të fundit.
Pas denoncimeve të mëparshme për praktikat doganore në Durrës dhe Kapshticë, ky material sjell akuza të reja nga brenda administratës doganore. Në qendër të tyre është mënyra se si trajtohen shkeljet e konstatuara, ndërhyrjet në kontrolle dhe përgjegjësia e drejtuesve që kanë kompetencë mbi këto procedura.
Discussion about this post