Zbardhen detaje të reja nga arrestimi i 52-vjeçarit Xherxh (Gjergj) Laçi, që u cilësua nga policia si radikalist. Teksa u mor në pyetje, shtetasi në fjalë e mohoi që ka dhunuar bashkëshorten Elena si dhe dy djemtë e mitur, Albanin dhe Sulltanin, përkatësisht 15 dhe 17 vjeç.
52-vjeçari Laçi ka dëshmuar para oficerëve të policisë dhe të Antiterrorit se nuk i linte fëmijët të dilnin nga banesa për të mos u infektuar.
“Kam ndjekur parimet e mia fetare. Fëmijët dhe bashkëshorten nuk i kam lënë të dalin për t’i ruajtur nga e keqja. Nuk doja që ata të nisnin drogën apo të infektoheshin”, ka pohuar Laçi.
Por krahas dëshmisë së tij, dy djemtë dhe nëna e tyre kanë treguar në prani të psikologëve se ata dhunoheshin sistematikisht.
Tashmë ata janë dërguar në një qendër rehabilitimi.
Xherxh Laçi, i njohur edhe me emrin Gjergj Laçi pritet të dalë të martën në Gjykatën e Tiranës për t’u njohur me masën e sigurisë.
Laçi u arrestua ditën e djeshme nga policia e Tiranës, pas denoncimeve nga të afërmit e bashkëshortes së tij.
Policia bëri me dije se 52-vjeçari ka qenë i dënuar më parë për armëmbajtje pa leje.
Gjatë kontrollit të banesës ditën e djeshme u gjetën dy mjete prerëse thika ndërsa gjatë kontrolleve të ambienteve përreth banesës, në oborr, u gjetën dhe sekuestruan 700 fishekë luftarak dhe krehra automatiku.
Discussion about this post