Ndrec Pjetri, ish-kandidat për deputet i Partisë Demokratike, i ftuar në studion e emisionit “Oponencë” në News24, ka komentuar situatën e brendshme në PD pas takimeve të zhvilluara javët e fundit nga Ervin Salianji dhe figura të tjera të reja të partisë, të cilat janë përballur me kritika nga lidershipi dhe kupola drejtuese.
Pjetri u shpreh se kryetari i partisë, Sali Berisha është dezinformuar dhe nuk ka marrë informacion të plotë, pasi, sipas tij, të dhënat i serviren të pjesshme, duke iu referuar pretendimeve se takimi i Elbasanit ishte organizuar nga Suel Çela.
“Doktorin e kanë dezinformuar, informacionet nuk i shkojnë deri në fund,” deklaroi ai, duke shtuar se brenda PD-së duhet të ngrihet një komision hetimor për të sqaruar situatën.
Sipas Pjetrit, opozita nuk e ka luksin të përfshihet në përplasje të brendshme, ndërkohë që sfidat politike janë të mëdha. Ai theksoi se problemi nuk qëndron te emra të përveçëm, por te thelbi i funksionimit të partisë dhe mënyra se si vlerësohen kontributet.
Duke iu referuar rezultateve zgjedhore, Pjetri vuri në dukje se, ndonëse PD ka pësuar humbje, ka edhe të rinj që kanë marrë një numër të konsiderueshëm votash. “Kemi 50 deputetë dhe është shumë mirë që janë aty, por ka struktura brenda partisë që po i anashkalojnë të rinjtë,” u shpreh ai.
Në përfundim, Pjetri bëri thirrje për një bashkim të madh brenda Partisë Demokratike, duke theksuar se partia është zvogëluar dhe se rritja e saj mund të vijë vetëm përmes dëgjimit të strukturave dhe votës së bazës. “Votat tona janë të shumta dhe duhet të dëgjohen,” përfundoi ai.
Pjetri theksoi se rezultatet zgjedhore kanë treguar qartë nevojën për rigjenerim të Partisë Demokratike. Sipas tij, në zgjedhjet e fundit, kandidatë të rinj dhe të paprovuar më parë arritën të marrin një numër të lartë votash, duke thyer rekorde. “Kjo tregon se PD ka nevojë për fytyra të reja dhe rigjenerim. Ajo që pamë në fushatë, sot po ngremë zërin për ta bërë realitet,” u shpreh ai.
Duke iu referuar zhvillimeve të fundit rreth Ervin Salianjit, Pjetri i cilësoi si dezinformim pretendimet se takimi me demokratët në Elbasan është organizuar nga Suel Çela. Ai theksoi se këto narrativa dëmtojnë debatin e brendshëm dhe largojnë vëmendjen nga problemet reale të partisë.
Ish-kandidati për deputet ndau edhe përvojën e tij personale në PD, ku është aktiv prej gati 20 vitesh. Ai tregoi se në zgjedhjet e 11 majit garoi si kandidat, por nuk iu dha mundësia të përfshihej në listat e hapura të PD-së, duke u detyruar të kandidojë në listën e Partisë Agrare Ambientaliste. Megjithatë, ai e vlerësoi fushatën si pozitive dhe për t’u përshëndetur.
“Jo gjithmonë e vjetra është në luftë me të renë, ato duhet të ecin bashkë,” u shpreh Pjetri, duke theksuar se zëri i ngritur nga figura të reja nuk synon pastrime apo përjashtime, por reflektim dhe vendimmarrje të drejtë nga strukturat.
Në përfundim, ai theksoi se baza e Partisë Demokratike duhet të pyetet realisht dhe të ketë një rol aktiv në vendimet e rëndësishme, si kusht për ringritjen dhe forcimin e partisë.
gijotina.com/
Discussion about this post