Rreth 20 ndërmarrje publike që i administron qeveria “Rama” janë në prag falimenti për shkak të keqmenaxhimit. Aq e paaftë dhe e korruptuar është Ministria e Financave dhe Ekonomisë, sa po i çon sot në greminë me dhjetëra ndërmarrje shtetërore. Në një raport të publikuar së fundmi, Kontrolli i Lartë i Shtetit ka treguar një sërë ndërmarrjesh që janë kthyer në gropë financiare. Në tabelën më poshtë janë renditur ndërmarrjet më problematike, ku Ministria e Financave ka deri në 100 % të aksioneve zotëruese.
Siç duket në të dhënat e mësipërme humbjet vjetore financiare të këtyre ndërmarrjeve fillojnë nga shifra 5 milionë lekë deri në 550 milionë lekë të reja. Ajo që bie në sy është se MFE ka në varësi ndërmarrje mjaft të rëndësishme si; OST, “Porti Detar” sha Vlorë, “Porti Detar” sha Sarandë, Porti Detar” sha Shëngjin, “Posta Shqiptare” sha Tiranë dhe shumë të tjerë. Pikërisht, këto ndërmarrje që kanë ndikim në sektorë mjaft të rëndësishëm për të ardhmen e vendit, MFE e drejtuar asaj kohe nga Anila Denaj dhe aktualisht nga Delina Brahimaj, i ka lënë pas dore dhe i ka rrënuar.
Shkeljet e konstatuar
Nga auditimi mbi monitorimin dhe miratimin gjatë vitit 2021 të pasqyrave financiare që i përkasin vitit 2020 janë konstatuar vonesa në dorëzimin e pasqyrave financiare në Drejtorinë e Administrimit të Pronës Shtetërore. Kjo vjen për shkak të mungesës së kontrolleve nga ministria dhe kërkesës së llogarisë. Duket se ministrja në atë kohë ka qenë e zënë duke bërë pazar për audituesit.
“Me memon e datës 18.1.2021 struktura ka bërë propozimet sipas kritereve ligjore e që rezulton e konfirmuar praktika deri në nivel zv.Ministri (pa u miratuar nga Ministrja Anila Denaj), por nga asambleja ka dalë tjetër listë nominative për emërim audituesish. Caktimi i audituesve nuk është bërë sipas propozimeve të Strukturës. Miratimi i audituesve kontabël nga asambleja është bërë me vonesë dhe mbas mbylljes së inventarëve fizike të aseteve të shoqërive, e cila i pengon ata për të dhënë sigurinë e nevojshme për vlerën e këtyre aseteve. Nga verifikimi konstatohet se struktura ka propozuar në kohë referuar protokollit të shkresave. Kjo vonesë është e pajustifikuar nga struktura e lartë drejtuese në nivel Asambleje”, thuhet në raport.
Ndërmarrje që falimentojnë
Për të gjitha institucionet e sipërpërmendura është detyrim ligjor që, Ministri si përfaqësues i pronarit shtetëror në çdo mbledhje duhet të mbajë qëndrimin e tij, pavarësisht kuorumit dhe përqindjes së aksioneve apo kuotave që disponon shteti. Por, në rastin konkret përfaqësuesi i Ministrisë së Financave nuk ka qenë i pranishëm në të gjitha mbledhjet. Si pasojë dokumentet financiare kanë kaluar pa u kontrolluar, duke lënë pasoja në disa shoqëri.
“Ministria, jo në të gjitha rastet ka marrë pjesë e kjo justifikohet për arsye të vonesave në firmosjen e qëndrimeve dhe autorizimeve nga struktura e lartë drejtuese si në rastet në: Shoqëria “I. D” shpk Elbasan ku rezulton se, është thirrur mbledhja e Asamblesë në datën 23 Shtator 2021, dhe Qëndrimi iDelina Brahimaj ka dalë i firmosur në datën 29.9.2021. Gjithashtu nga shoqëria “F. A.” shpk Kavajë është thirrur mbledhja e Asamblesë 7 Shtator 2021, dhe Autorizimi dhe Qëndrimi i Ministrit ka dalë i firmosur në datën 15 Shtator 2021”, thuhet në dokument.
Ndërsa për rastin që lidhet me shoqërinë “M” sha Korçë, regjistrohen 110 vonesa të pajustifikuar në vendimmarrje, që ka sjellë si rrjedhojë tejzgjatjen e kësaj problematike deri në nisjen e procesit gjyqësor për shpalljen e falimentit. Edhe ky rast është neglizhencë e MFE.
Abuzimi me programet ekonomike
Nga auditimi rezultoi se në disa raste miratimi i disa prej programeve të zhvillimit ekonomik është përtej afatit. Këto vonesa kanë ardhur kryesisht nga prononcimi me vonesë i ministrive të linjës si dhe parregullsitë apo mungesat në dokumentacionin. Sakaq, KLSH specifikon se kjo vonesë është e pajustifikuar nga struktura e lartë drejtuese e MFE në kundërshtim me detyrimet e Ligjit Nr. 9901, datë 14.4.2018 “Për tregtarët dhe shoqëritë tregtare” të ndryshuar, e të Ligjit Nr.25, datë 10.5.2018 “Për kontabilitetin dhe pasqyrat financiare”.
Janë konstatuar një sërë vonesa e parregullsi në dokumentacion nga Ministritë e linjës në lidhje me miratimi i disa prej programeve të zhvillimit ekonomik të shoqërive tregtare me kapital shtetëror. Çka do të thotë se është abuzuar me programet ekonomike të planifikuara për këto ndërmarrje. Madje, KLSH e cilëson këtë neglizhencë të MFE si hapje rrugë abuzimit.
Lexo edhe këtë: Dokumenti konfidencial/ KLSH nxjerr nga Thesari i Shtetit “sekretet” e tenderave të Lali Erit, 281 manipulime
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post