Prej dy ditësh vendi ynë është përfshirë nga moti i keq, ku reshjet e dendura të shiut kanë pushtuar të gjitha zonat. Si në çdo vit më problematike mbetet qyteti i Shkodrës. Prej vitesh Shkodra përmbytet sa herë që bie shi dhe deri më sot nuk është dhënë një zgjidhje nga qeveria. Kur në fakt ekspertët kanë thënë se mund të parandalohet përmbytja në këto përmasa. Pasditen e së dielës situata u përkeqësua dhe Bashkia Shkodër ka njoftuar se është shembur ura e Bahcallëkut.
Çka ka bërë që të pezullohet lëvizja në këtë aks dhe disa zona të izolohen plotësisht. Deri më tani e vetmja lëvizje nga shteti është telefonata që Presidenti, Bajram Begaj, ja bërë me Prefekten e Shkodrës, ku i ka kërkuar që strukturat të jenë në këmbë. Por tashmë gjëma e u bë. Ura u prish dhe situata në këtë zonë ka dalë jashtë kontrolli.
Tashmë asnjë lëvizje për evakuim dhe asnjë telefonatë nuk mund të kthejë mbrapsht dëmin dhe rrezikun e krijuar në këtë zonë. Ndërsa vlen të përmendet se Bashkia Shkodër e kishte paralajmëruar këtë situatë 5 vjet më parë. Në 14 dhjetor 2017 deri tani, ish-kryetarja e Bashkisë së Shkodrës Voltana Ademi i kërkonte zyrtarisht me shkresë ministrisë së Mbrojtjes që të merrte masa për mbrojtjen e Urës së Bahçallëkut. Kanë kaluar plot 5 vjet dhe askush nuk e “ vuri ujin në zjarr”. Si pasojë e ngelizhencës ura u shkatërrua nga rrjedha e fortë e Drinit.
Në kërkesën e dërguar, Voltana Ademi, kryetare e bashkisë së Shkodrës, i shkruante Ministrisë se ajo ishte ura më e vjetër që lidhte qytetin e Shkodrës me bregun jugor të lumit Drin. “Kjo urë ka lidhur historikisht qytetin (kështjellën) me lagjen jugore të Bahcallëkut, por edhe me zonën e Nënshkodrës, dhe me gjithë Shqipërinë poshtë lumit Drin”, shkruan Ademi në kërkesën zyrtare për mirëmbajtjen e urës.
Ura me pesë harqe prej guri, vazhdon dokumenti, u shemb gjatë një tërmeti në gjysmë e dytë të shekullit të XIX. U rikonstruktua totalisht, duke shembur harqet. E duke ruajtur bazamentet e këmbëve të urës dhe duke vendosur mbi ta trarë çeliku. Kjo ndërhyrje u bë në kuadër të një qëndrueshmërie më të lartë strukturale si dhe të përshtatjes së urës me nevojat e automjeteve për një qarkullim komod. Por, që nga viti 1997 nuk ka pasur përpjekje për riparimin apo mirëmbajtjen e saj. Tashmë ajo u shkatërrua plotësisht, duke lënë të izoluar zonën që lidhej përmes kësaj ure me qytetin.
Rreziku rritet
Ndërkohë, sinoptiket shprehen se qarku i Shkodrës paraqitet më problematiku pasi ka përmbytje. Rrjedha e ujit ka marrë babanë me 2 fëmijët në Bogë të Malësisë së Madhe. Pjetër Rushaj me dy fëmijët po udhëtonin me mjet pranë Përroit të Thatë. Ndërkohë Ministria e Arsimit ka marrë vendimin për pezullimi në 16 shkolla në këtë qark.
Afro 1 mijë hektarë tokë bujqësore janë nën ujë. 21 familje janë evakuuar. Disa fshatra pa drita, probleme në rrugët dytësore. Nga inertet është bllokuar rruga kryesore në Zues dhe lejohet lëvizja në një korsi. Përroi Nikgjonaj në Theth ka dalë nga shtrati ku ka prezencë uji në 3 banesa.
Edhe në hyrje te qytetit të Shkodrës, te Harku i Bërdicës ka prezencë uji dhe aksi është i kalueshëm vetëm për mjete te tonazhit të lartë. Në Theth bie bora e parë.
Lexo edhe: Moti i keq, apeli i kryebashkiakut Shkodër: Situata po përkeqësohet
Discussion about this post