Deputeti i Partisë Socialiste, Erion Braçe, ka bërë thirrje për ndalimin e abuzimeve me çmimet, duke vënë theksin te produktet e importit dhe ndikimin e tyre në tregun vendas.
Gjatë fjalës së tij, ai u ndal veçanërisht te çmimi i domates, duke theksuar diferencën e madhe mes çmimit të importit dhe atij me të cilin shitet për konsumatorët.
“Që nga nëntori kemi pasur dëme kolosale në bujqësi për shkak të kushteve të motit, përmbytjet kanë qenë ato që e kanë shoqëruar bujqësinë, kemi qenë nën agresionin e importit. Për shkak të importit, çmimet që kanë qenë në treg kanë qenë të justifikuara në këtë fakt. Unë i jam drejtuar Drejtorisë së Doganave, veçanërisht për domatet. Të ardhura nga Greqia, Itali, Serbia dhe Turqia.
Janë 2500 tonë nga 1 janari-31 mars dhe çmimet me të cilat janë importuar dhe zhdoganuar të habisin. Të gjitha kanë blerë domate me 400 deri në 500 lekë për kg. Ndërkohë çmimet e importit janë nga Greqia 56 lekë, nga Italia 59 lekë, nga Serbia 274 lekë, nga Turqia 64 lekë. Këto numra janë 5 deri në 10 herë më të lira sesa çmimi me të cilin qytetarët shqiptarë kanë blerë domatet. Ky është një abuzim skandaloz në një tregu ku nuk qarkullon faturë fiskale”, tha Braçe.
Ai apeloi që të mbrohet prodhimi vendas, pasi ne te kundërt importi do të vazhdojë edhe muajt e ardhshëm.
“E vetmja thirrje që kam, përveç faktit që duhet mbështetur shumë fort prodhimi bujqësor dhe duhet mbështetur tani, përndryshe në korrik gusht e shtator do vazhdojmë të importojmë. Thirrja tjetër është se duhet ndalur ky abuzim. Edhe në kushtet e importit abuzimi është skandaloz”, deklaroi deputeti i PS.
Discussion about this post