Gara për titullin në Maqedoninë e Veriut është bërë maksimalisht e luftuar kur kanë mbetur dhe 4 javë për t’u luajtur. Tri skuadra shqiptare e kanë kthyer në një garë mes tyre fatin e titullit, teksa diferenca mes Strugës, Shkupit dhe Shkëndijës është vetëm 3 pikë.
Gjithçka pritet të përcaktohet në javën e fundit, pasi të tria skuadrat shqiptare do të takohen me njëra-tjetrën. Duke përjashtuar javën që vjen, ku gara do të vijojë në distancë, në javën e 31-të Shkupi do të presë Shkëndijën. Më pas në javën e 32-të, kuqezinjtë e Tetovës do vizitohen nga Struga, ndërkohë që në javën e fundit, kampionët në fuqi të Strugës do matin forcat me Shkëndijën.
Tre skuadrat që drejtohen nga tre trajnerë shqiptar do synojnë të bëjnë më të mirën e tyre. Shpëtim Duron edicionin e shkuar fitoi titullin e parë me Stugën e kërkon të ruajë fronin, Shkupi emëroi Ernest Gjokën, i cili titullin e ka fituar me Shkëndijën në 2020-2021 e tani synon të ketë të njëjtin sukses me “bardheblutë”, ndërsa Shkëndija drejtohet nga Jeton Beqiri, i cili tenton trofeun e parë të rëndësishëm në karrierë. Javët e fundit premtojnë spektakël në Maqedoninë e Veriut, ku e sigurt është që titulli do të mbetet në zotërimin e skuadrave shqiptare, cilado qoftë ajo.
Discussion about this post