Trajneri shqiptar Ilir Daja është padyshim “arkitekti” i sukseseve të Ballkanit të Suharekës. Skuadra portokalli, është shumë pranë grupeve të Conference League, për herë të dytë radhazi.
Kampionët e Kosovës, mposhtën mbrëmjen e sotme, bjellorusët e BATE Borisov me rezultatin 4-1. Në lidhje me këtë sukses trajneri Daja, foli pas ndeshjes për mikrofonin e “Supersport Kosova” ku u shpreh:
“Mos mu bëj si disa specialistë në Kosovë, që kujtojnë vetëm humbjen ndaj Ludogorets. Kjo fitore i shkon Emërllahut, sepse dje është operuar.
Shpresojmë që të rikthehet sa më shpejt me ekipin. E gjithë kjo fitore shkon për tifozët, që sot ishin të shumtë në Kosovë.
Këta djem nuk dorëzohen kurrë. Në pjesën e parë kemi pasur 4-5 raste shënimi. Kemi pësuar një gol që futbolli i ka këtu, kundër një ekipi me shumë eksperiencë. Sot tregoi që brenda ekipit ka lojtarë goxha të mirë.
Kemi dominuar mbi kundërshtarin në çdo lloj gjëje. Kemi humbur shumë më tepër gola se kemi shënuar. Mund të ishim pak më të ftohtë para portës, në mënyrë që të kishim shënuar.
Gjithsesi një rezultat 4-1 kundrejt një kundërshtari me eksperiencë, është një fitore goxha bindëse që këta çunat e Ballkanit e meritojnë. Meritojnë një bravo të madhe se çfarë kanë bërë.
Vitin tjetër shtohet dhe një skuadër në Europë. Sukseset e Ballkanit përkthehen edhe në sukseset e Kosovës.
Është ndeshje jonë e shtatë, kemi 6 fitore dhe vetëm 1 humbje. Le të merren specialistët me atë humbje, sepse nuk po i zë gjumi në darkë.
Ne trajnerët nuk zbërthehemi nga ana tekniko-taktike. Kemi rregulluar diçka brenda manovrës tonë, që na rezultoi pozitive.
Besoj që në pjesën e dytë korrigjuam të metën e vogël që kishim në pjesën e parë. E penguam BATE-n që të na vijë në aksione të rrezikshme.
Suksese Kosova, sepse Ballkani e ka kaluar përfaqësimin e Suharekës. Ky urim shkon për të gjithë ata që na kanë mbetur, edhe në stadium edhe nëpërmjet televizionit”, u shpreh Daja, i cili, dukshëm i nervozuar për kritikat e ekzagjeruara ndaj tij, për humbjen ndaj Ludogorets, nuk i kurseu kunjat ndaj atyre që e shigjetuan tërë kohën, mbi të gjithë “rivali” i tij në Kosovë, “mjeshtri i madh” Ismet Munishi (edhe pse nuk ia përmendi emrin).
Discussion about this post