Erion Veliaj e gjen mënyrën për të shpërndarë fonde publike për sipërmarrës privatë edhe kur nuk ka nevojë. Kështu duket pikërisht me një tender të realizuar së fundmi nga Bashkia e Tiranës, ku kërkohet ngritja e disa kabinave dezinfektimi për shkak të luftës ndaj Covid-19. Por kjo duket më shumë një shpërdorim fondesh sesa mbrojtje nga virusi vdekjeprurës, në një kohë që Shqipëria ka zbutur masat në maksimum, që nga orari apo mbajtja e maskave në ambiente të hapura apo të mbyllura. Megjithatë, ashtu si Don Kishoti luftonte me mullinjtë e erës, edhe kryebashkiaku i Tiranës ka luftën e tij për të shpërdoruar fondet publike.
Sipas të dhënave të publikuara nga openprocurement.al rezulton se Drejtoria e Përgjithshme e Objekteve Publike, institucion në varësi të Bashkisë Tiranë ka hapur një tender për blerje kabinash për dezinfektim. Kjo procedurë publike është fituar nga kompania Frozzer shpk, me një vlerë prej 3 milionë e 582 mijë lekë të reja, ose e thënë ndryshe rreth 30 mijë euro.
Por, vëzhgimi ynë shkoi më tej për këtë tender të dyshimtë, i cili rezulton se është zhvilluar vetëm me një konkurrent të vetëm, akt i cili nuk është i ndaluar me ligj, por lë dyshime të forta për favorizime. Për këtë arsye, ne verifikuam se kush është pronari i kësaj kompanie, që rezulton se ka aksioner kryesor Pëllumb Gjokën.
Gjoka nuk është një emër i panjohur për publikun shqiptar, pasi më herët është akuzuar nga politika për lidhje me krimin. Konkretisht Pëllumb Gjoka është një person i akuzuar nga Partia Demokratike si përgjegjës kryesor për masakrën zgjedhore të 25 Prillit, i cili është “shpërblyer” nga dyshja Rama-Veliaj për kontributin e tij në “minimin” e demokracisë nëpërmjet një tjetër tenderi. Bëhet fjalë për një tender të fituar po me mungesë konkurrence për “Shërbim mirëmbajtje dhe furnizim me solucion për tunelet e dezinfektimit” me vlerën e përafërt 242 mijë euro, tender që sipas Partisë Demokratike është shpërblim për “masakrën zgjedhore” të 25 Prillit.
Po ashtu, Pëllumb Gjoka është akuzuar drejtpërdrejt nga ish-kryetari i PD Lulzim Basha si një nga trafikantët më të fuqishëm të drogës në zonën e Velipojës dhe të Shkodrës dhe si njeri me mbështetje nga kryeministri Edi Rama.
Megjithatë, akuzat e opozitës nuk e kanë ndalur Veliajn të lëshojë tendera për këtë kompani, ndërkohë që dihet se këto akuza duhet të hetohen nga prokuroria speciale SPAK, një institucion që shpesh herë është përfolur se influencohet nga kryebashkiaku i Tiranës.
Discussion about this post