Sekretari i përgjithshëm i PD-së, Gazment Bardhi ka reaguar pas dorëheqjes së Ardi Veliut nga posti i drejtorit të përgjithshëm të Policisë së Shtetit.
Bardhi e ka konsideruar si një bandit më pak në policinë e shtetit dorëheqjen e Veliut, pasi sipas tij i ka shërbyer grupeve kriminale dhe rrjeteve të caktuara të trafikut ndërkombëtar të drogës.
“Në krye të Policisë së Shtetit sot ka një bandit më pak. Ardi Veliu ka qenë çdo ditë në shërbim të grupeve kriminale dhe rrjeteve të caktuara të trafikut ndërkombëtar të drogës. Largimi i tij është i detyruar, pavarësisht rezistencës së gjatë të Edi Ramës”- është shprehur Bardhi.
Sekretari i selisë blu ka renditur disa nga dështimet e Ardi Veliut, gjatë drejtimit të Policisë së Shtetit. Sipas tij, Shqipëria u rendit ndër vendet kryesore për trafikimin e drogave nga kokaina tek kanabisi. Departamenti i Shtetit e futi Shqipërinë ne listën e vendeve kryesore për pastrimin e parave të pista. Të drejtat dhe liritë e qytetarëve u përkeqësuan, duke kulmuar me vrasje në rrugë të të rinjve dhe me rrahje të minorenëve. Dhuna e ushtruar ndaj opozitës ishte e paprecedentë. So dhe policia u përdor në zgjedhje, krah përkrah banditëve, për të blerë vota për partinë në pushtet.
“Ardi Veliu nuk është as i pari, as i fundit drejtor policie që gjatë këtyre 8 viteve largohet me turp, duke i shkaktuar dëme të mëdha vendit dhe qytetarëve. Kjo histori do të përsëritet përsa kohë shefi i ardivelinjve, Edi Rama, të jetë partneri kryesor i krimit të organizuar. Pa largimin e Edi Ramës, nuk ka për të patur kurrë luftë serioze ndaj krimit, policët e ndershëm do të vazhdojnë të ndihen të tradhëtuar dhe të demotivuar, si dhe ngjarjet e rënda kriminale do të vijojnë të trondisin qytetet tona” – ka thënë Gazment Bardhi.
Dorëheqjen e Veliut e ka bërë të ditur kryeministri Edi Rama me anë të një postimi në rrjetin social twitter.
