Pas dhënies së dorëheqjes së Lulzim Bashës, ka reaguar edhe ambasada e Shteteve të Bashkuara të Amerikës në Tiranë. Sipas ambasadës, Vendimi i marrë nga Lulzim Basha sot meriton respekt, pasi sipas tyre shkon përtej interesave të partisë dhe të vendit mbi ato personale është shenjë e udhëheqësisë së vërtetë. Ambasada e SHBA-së gjithashtu shprehet se mbështetja e tyre dhe për të luftuar korrupsionin dhe pandëshkueshmërinë mbeten të pandryshuara.
“Vendimi i marrë nga Lulzim Basha sot për t’u dorëhequr si Kryetar i Partisë Demokratike meriton respekt. Vënia e interesave të partisë dhe të vendit mbi ato personale është shenjë e udhëheqësisë së vërtetë. Shpresojmë që vendimi do të përcaktojë rrugën që Partia Demokratike të ecë përpara drejt së ardhmes; do të forcojë marrëdhënien e veçantë të Shqipërisë me Shtetet e Bashkuara; do të përforcojë mbështetjen për reformat dhe përpjekjet e tjera për qëllimin e Shqipërisë për t’iu bashkuar Bashkimit Europian; dhe do të ritheksojë parimet dhe idealet demokratike mbi të cilat u themelua. Një opozitë e fortë që mund të jetë e gatshme për të udhëhequr është thelbësore për demokracinë. Mbështetja e Shteteve të Bashkuara për demokracinë dhe përkushtimi për të luftuar korrupsionin dhe pandëshkueshmërinë mbeten të pandryshuara” – thuhet në reagimin e ambasadës së SHBA-së.
Discussion about this post