Pas takimit të zhvilluar në Sarandë nga Ministri i Punëve të Brendshme, Besfort Lamallari, mbi problematikat e ndërtimeve pa leje dhe zaptimit të hapësirave publike, janë marrë masa të tjera në nivel institucional, pas arrestimit të shefit të komisariatit të qytetit.
Nga detyra është larguar edhe drejtori i Drejtorisë Rajonale të IKMT-së në Vlorë, Elton Caslli, i cili mësohet se ka paraqitur dorëheqjen pas nisjes së procedurave për masa administrative nga IKMT qendrore. Shkak për këtë vendim është bërë, sipas burimeve, mosushtrimi i detyrave funksionale dhe pasojat e konstatuara në territor.
Po ashtu, është iniciuar procedurë disiplinore edhe ndaj Përgjegjësit të Sektorit të Inspektimit të Territorit pranë Drejtorisë Rajonale të Vlorës, Xhovalin Hoxhaj.
Gjatë takimit në Sarandë, ministri Lamallari kërkoi reagim të menjëhershëm dhe përgjegjësi nga strukturat ligjzbatuese, duke përfshirë Policinë e Shtetit, IKMT dhe IMT, për të frenuar paligjshmërinë në territor.
“Dilni për Zot përgjegjësisë, që ju është dhënë. Ne nuk mund të lejojmë të cënohet diçka që është më e madhe. Zero tolerancë ndaj paligjshmërisë dhe përgjegjësi për çdo mosveprim institucional. Ndërtimet pa leje, zaptimi i hapësirave publike apo abuzimet në kurriz të interesit qytetar dhe zhvillimit të qëndrueshëm të turizmit, janë një vijë e kuqe”, tha ministri Lamallari gjatë fjalës së tij.
Discussion about this post