Blerina Bala ka dhënë dorëheqjen pas rreth 2 muajsh si kryetare e komanduar e Bashkisë Himarë. Vendimi për t’u dorëhequr nga pozicioni i kryetares së komanduar të Himarës ishte për arsye personale dhe pamundësi në realizimin e detyrës, sipas letrës së dorëheqjes së Balës.
Tashmë ,sipas ligjit për funksionimin e pushtetit vendor, do të jetë Këshilli Bashkiak i Himarës që pritet të mblidhet të premten për të votuar dhe komanduar një tjetër kryetar. Raportohet se socialistët kanë gjasa të propozojnë Arqile Bollanon.
Në 29 Mars të 2024-ës, Këshilli Bashkiak i Himarës votoi mes tensionesh Blerina Balën si kryetaren e re të komanduar. Me 15 vota pro dhe 4 kundër, Këshilli vendosi që Blerina Bala të ushtrojë detyrat e kryebashkiakes deri në mbajtjen e zgjedhjeve të reja.
Komandimi i Blerina Balës në krye të Bashkisë së Himarës erdhi pas dorëheqjes së Jorgo Goros, i cili u arrestua nga Prokuroria e Posaçme me akuzën e shpërdorimit të detyrës për tjetërsimin e 2 pronave.
Ndërkohë Fredi Beleri, i cili në 14 Maj u zgjodh kryetar i Bashkisë vuan në burg dënimin me 2 vite heqje lirie për veprën penale të blerjes së votave, dhënë nga shkalla e parë.
Letra
“Ndjehem e nderuar dhe e privilegjuar që mu dha mundësia të drejtoja Bashkinë Himarë për këtë periudhë aq sa të vështirë dhe të mrekullueshme për mua”, shkruan Balla në letrën e dorëheqjes.
“Gjatë kësaj kohe jam përpjekur të punoj me përkushtim dhe e palëkundur, për të trajtuar dhe zgjidhur çështjet që janë paraqitur para meje Sidoqoftë për shkaqe personale që kërkojnë kohën dhe vëmendjen time të plotë, me keqardhje ju njoftoj pamundësinë time për te vazhduar detyrën e Kryetares së Bashkisë Himarë që mu besua dhe nga Këshilli Bashkiak Himare”, shton.
“Me këtë letër, sot zyrtarisht paraqes dorëheqjen time të parevokueshme nga pozicion i Kryetares së Bashkisë Himarë. Dua të shpreh falënderimet dhe mirënjohjen më të thellë stafit të Bashkisë Himarë, Këshillit Bashkiak Himarë dhe çdo banori të Himarës për mbështetjen dhe për vlerat njerëzore që kemi ndarë gjatë kësaj periudhe. Përulësisht kërkoj të pranoni mirënjohjen time të sinqertë, për bashkëpunimin dhe për çdo gjë që kemi arritur së bashku”, mbyllet letra.
Discussion about this post