Borussia Dortmund ka dalë triumfuese 1-0 nga “Signal Iduna Park” në gjysmëfinalen e parë të Champions League ndaj PSG-së.
Ka qenë një ndeshje fantastike, ku në fakt priteshin më shumë gola, por vetëm një ishte vendimtar në këtë përballje.
Fillimisht, loja ishte mjaft e vakët, me skuadrat që hezitonin të sulmonin. Shumë pak për të thënë për kampionët e Francës, përveç dy goditjeve nga distanca të Dembele, që gjithsesi nuk sollën asnjë rrezik në portën e mbrojtur nga Kobel.
Në të 36-tën, Nico Schlotterbeck nisi një asist me “telekomandë”, me sulmuesin Fulkrug që me një të majtë të bukur mposhti Donnarumman.
Në të 44-tën, Sabitzer shkaktoi drithërima në stadium, gjithsesi vetëm kaq, pasi Donnarumma neutralizoi topin.
Në pjesën e dytë, Mbappe me shokë provuan të ndryshonin fatin e takimit. Fati nuk ishte me Mbappe në të 50-tën, yllin francez e ndali vetëm shtylla.
Pak më vonë, Fabian Ruiz “flirtoi” me golin, duke i shpëtuar mjaft mirë mbulimit të mbrojtjes, por pa u koordinuar si duhet me kokë.
Pavarësisht rasteve të shumta, rezultati mbeti i njëjtë deri në vërshëllimën përfundimtare të arbitrit anglez Taylor. Skuadra e kualifikuar për në finalen e madhe do të vendoset në ndeshjen e kthimit, që do të mbahet në Paris.
Discussion about this post