Prokuroria e Posaçme Kundër Korrupsionit dhe Krimit të Organizuar (SPAK) ka përfunduar hetimet për fraksionin e ndarë të dosjes “Metamorfoza”, duke dërguar për gjykim nëntë të pandehur, të hetuar në mungesë, pasi masat e sigurisë ndaj tyre nuk janë ekzekutuar prej rreth tre vitesh.
Sipas SPAK, prokurorët Arben Kraja dhe Bledar Maksuti kanë mbyllur hetimet ndaj Ervis Martinajt, i cili rezulton i zhdukur që prej vitit 2022, si dhe ndaj Denis Bajrit, Klaodor Hakajt, Prekë Kodrës, Aleks Ndrekës, Bardhyl Mavrës, Eljon Hatos dhe Arsad Bashlit.
Hetimet janë mbyllur gjithashtu edhe për Nuredin Dumanin, i cili ndodhet në masën e sigurisë “arrest në burg”, ka statusin e bashkëpunëtorit të drejtësisë dhe po gjykohet paralelisht edhe në kuadër të megaoperacionit “Plumbi i Artë”.
SPAK ka ngritur ndaj të pandehurve akuza për “vrasje me paramendim”, kryer në kuadër të grupit të strukturuar kriminal, “grup të strukturuar kriminal”, “kryerje të veprave penale nga grupi i strukturuar kriminal dhe organizata kriminale”, “sigurim të kushteve dhe mjeteve për kryerjen e vrasjes”, si dhe “mbajtje pa leje dhe prodhim të armëve, armëve shpërthyese dhe municionit”.
Dosja tashmë i ka kaluar Gjykatës së Posaçme Kundër Korrupsionit dhe Krimit të Organizuar (GJKKO), ku pritet të hidhet shorti për caktimin e gjyqtarit që do të shqyrtojë kërkesën e SPAK për kalimin e çështjes në gjykim.
Nga nëntë personat e dërguar për gjykim, vetëm dy ndodhen aktualisht në paraburgim: Aleks Ndreka, i njohur me nofkën “Leksi i Druve”, dhe Denis Bajri, i njohur edhe me mbiemrin Brajovic.
Discussion about this post