Arrestimet lidhur me çështjen e njohur si “5 D” u përmendën nga ish-kryeministri Sali Berisha, gjatë protestës së mbajtur këtë pasdite poshtë banesës së tij. Berisha tha se “kryehajduti i tyre” është Erion Veliaj. Për kryebashkiakun, shtoi se ka ditur gjithçka për aferat e vartësve dhe ka marrë për vete “pjesën e luanit” nga tenderat korruptivë. Por, pavarësisht kësaj, vuri në dukje se Veliajt “nuk i hyn gjemb në këmbë”.
“Dy fjalë do them për këta të famshmit 5D, pesë drejtorë hajdutë. Secili prej tyre, do të më falni për shprehjen, por përfaqëson një maskara njeri, një hajdut të shpifur, të neveritshëm. Por miqtë e mi, kryehajduti i tyre, hyn dhe del në zyrë, pa i hyrë gjemba në këmbë. Dhe ai është Erion Veliaj. Dhe ai është Erion Veliaj, i cili ka ditur gjithçka për aferat e tyre. Ka ditur çdo gjë për tenderat që fitonin. Ka marrë për vete pjesën e luanit nga ato tendera”, tha Berisha.
Ai ngriti dyshime se prokurorë të SPAK kanë komunikuar me Veliajn.
Berisha u ndal edhe te denoncimi i bërë më het gjatë ditës nga selia blu nga Gazment Bardhi, i cili denoncoi me dokumente se Olsi Rama – vëllai i kryeministrit, është i përfshirë në dosjen e kokainës “Xibraka”.
Berisha tha se për të sfumuar këtë skandal, Rama urdhëroi arrestimet e sotme të drejtorëve të Bashkisë Tiranë.
Ai i bëri thirrje Edi Ramës që të japë dorëheqjen nga posti i kryeministrit.
Deklaratën e mbylli me një thirrje drejtuar qytetarëve për “mosbindje civile”.
Discussion about this post