Dosja “5D”/ Si firma e drejtorëve dhe “Fusha shpk” fituan tenderin e dyshimtë 2 mln Euro për rrugën e Vlorës

Kompania “5D Konstruksion” nën hetim për skandalin e abuzimeve të korrupsionit të drejtorëve të Bashkisë së Tiranës, duket së nuk është kufizuar në firmosjen e tenderave nga autoriteti kontraktor Bashkia e Tiranës, por ka shkuar dhe më tej në marrjen e projekteve të mëdha.

Në dosjen e SPAK-ut është evidentuar një komunikim i një prej punonjësve të shoqërisë “5D”, e cila në komunikimet e zhvilluara në muajin shkurt të vitit 2021 tregon për një procedurë prokurimi që “5D”-ja ka fituar.

Nga verifikimet rezulton se bëhet fjalë për ndërtimin e rrugës që lidh aeroportin e Vlorës me autostradën e këtij qyteti procedurë prokurimi e fituar nga shoqëria “5D” dhe “Fusha shpk”, ku dyshohet se është përfituar nëpërmjet procedurave të paligjshme.

Për këtë procedurë, në arsyetimin e saj, Apeli shprehet se nga ana e Prokurorisë nuk kanë një analizë për mënyrën se si është fituar kjo procedurë, raporton “Ora News”, duke iu referuar vendimit të gjykatës.

Sipas të njëjtit burim, Prokuroria e Posaçme ka evidentuar gjithsej 12 procedura prokurimi, e ndërsa besohet se shoqëria “5D” ka nën dyshim edhe 11 tendera që mund të jenë subjekt hetimi për SPAK-un.

Tenderi

Tenderi në fjalë është tenderuar në Tetor 2021 nga Autoriteti Rrugor Shqiptar, asokohe i drejtuar nga Evis Berberi – sot pas hekurave nën akuzën e korrupsionit dhe pastrimit të parave.

Në këtë procedurë kanë marrë pjesë 15 kompani, mes tyre edhe bashkimi i operatorëve “Fusha” dhe V.A.S Konstruksion (firma që sipas SPAK zotërohet de facto nga drejtorët e Veliajt Mariglen Qato dhe Redi Molla).

Fusha dhe V.A.S Konstruksion alias 5D Konstruksion u renditën të 11-tët në listën e ofertave me vlerën më të ulët të propozuar pranë ARRSH-së. Diferenca mes ofertës së Fushës e 5D dhe asaj më të ulët ishte plotë 700 milionë lekë. Megjithatë, bashkimi i operatorëve Fusha e 5D u shpall fitues dhe arkëtoi rreth 2 mln euro pasi të gjitha kompanitë e tjera që paraqitën ofertë më të ulët, u s’kualifikuan. Tenderi ka pasur ankesa që nuk janë pranuar nga Komisioni i Prokurimit Publik.

Procedura është klasifikuar me flamur të kuq nga portali i specializuar për analizën e tenderave “Open Data” për shkak të “s’kualifikimit të të gjithë operatoreve konkurrues përveç fituesit”.

Një klasifikim i tillë tregon se procedura ka rrezik të lartë korrupsioni, siç dyshon dhe gjyqtari i Apelit të Posaçëm.