Seanca e rradhës ndaj kryebashkiakut të zgjedhur të Himarës, Fredi Beleri, do të zhvillohet ditën e hënë, ndërsa dosja në ngarkim të tij ka kaluar për gjykim.
Avokati i Fredi Belerit tha se nuk ka pse klienti i tij të vijojë të qëndrojë në burg, ndërsa shtoi se nuk kishin asnjë pritshmëri nga kjo gjykatë.
“Ne do të thërrasim 50-60 dëshmitarë, pra gjyqi do të zgjasë. Do të thërrasin edhe ato persona që pretendohet se janë paguar për të dhënë votat në favor të Fredi Belerit.
Ai vetë ka kërkuar që të mos zhvillohet proces i shkurtuar. Është një gjykim që do të zgjasë dhe nuk ka pse Beleri të qëndrojë në burg”, tha avokati.
Sipas tij, vetë kryebashkiaku i Himarës, ka deklaruar se po mbahet në burg politikisht dhe se Prokuroria nuk ka asnjë provë kundër tij.
Avokati i Belerit ka pohuar se çështja ndaj Belerit do të shkojë deri në Strasburg, por më parë duhet të konsumohen hallkat e gjyqësorit në Shqipëri, përfshi këtu edhe Gjykatën Kushtetuese.
SPAK ka kërkuar që çështja të kalojë në gjykim, duke pretenduar se kanë prova, ndërsa avokatët kanë kërkuar pushimin e çështjes. GJKKO ka vendosur që çështja të kalojë për gjykim, çka do të thotë se do të kemi një gjykim në themel për kryebashkiakun e zgjedhur të Himarës, Fredi Beleri.
Beleri u arrestua dy ditë para zgjedhjeve të 14 majit, me pretendimin se kishte blerë vota në favor të tij. Beleri e ka mohuar që nga momenti i parë akuzën, ndërsa Prokuroria pretendon se ka prova filmike dhe dëshmi të personave që janë të kontaktuar për shitjen e votës së tyre.
Discussion about this post