Pas 6 vite hetime të zhvilluara në Itali dhe Shqipëri, prokuroria e posaçme SPAK, arriti që në muajin Maj 2025 të konkretizojë hapat proceduriale me goditjen e klanit “Troplini” në Durrës. Gazetari i “Ora News”, Elton Qyno ka mësuar se dosja “Troplini” është një procedim që mban Nr. 36 dhe është regjistruar në vitin 2019 në Prokurorinë e Krimeve të Rënda.
Baza e informacionit kanë qenë të dhënat që italianët kanë sjellë në Shqipëri, ku kërkonin ndihmë të ndërsjelltë me qëllim krijimin e skuadrave të përbashkëta dhe hetimin në dy linja paralele në Itali dhe Shqipëri.
Hetimi nga Krimet e Rënda, nuk ka vijuar për shkak se në dhjetor 2019 kjo prokurori pushoi se funksionuari, pasi në lojë me ndryshimet ligjore hyri prokuroria e Posaçme SPAK.
Dy prokurorët e dosjes Vladimir Mara dhe Dritan Prençi, kanë kryer transferimin e akteve hetimore të dosjes “Troplini” nga Krimet e Rënda tek Prokuroria e Posaçme, duke vijuar hetimet për gati 6 vite më pas.
Hetimi është ndjekur nga disa gjyqtarë paraprakë por së fundi ka qenë gjyqtarja Irena Gjoka që ka ndërmarë veprimet. Pas një koordinimi bisedash telefonike të përgjuara të Elvis Doçit alias “Visit të Pojës” dhe anëtarëve të tjerë të grupit si dhe analizimit të kodeve të platformës elektronike “SKY”, SPAK ka vendosur të lëshojë 29 urdhër-arreste.
Në 19 Mars 2025, dy prokurorët e SPAK kanë zbritur në gjykatë kërkesën për caktimin e masave të sigurisë ndaj 29 personave që ishin të Klanit Troplini në Shqipëri. Ndërsa në Italia, nga prokuroria e Barit, në 21 Shkurt 2025, ishin lëshuar 28 urdhër-arreste.
Në Shqipëri, kërkesa për caktimin e masës së sigurisë është marrë në shqyrtim nga gjyqtarja paraprake, Irena Gjoka, e cila për gati 1 muaj e gjysëm nga shqyrtuar dosjen e prokurorisë dhe në datën 30 Prill 2025, ka pranuar kërkesën e dy prokurorëve, duke firmosur 29 urdhër-arrestet e kërkuara prej tyre.
Vetëm 20 ditë pas marrjes së vendimit nga Gjykata e Posaçme, SPAK në 21 Maj 2025, ka ndërhyrë duke vënë në ekzekutim këtë vendim, me qëllim arrestimin e emrave të njohur të botës së krimit, të cilët u goditën fiks 10 ditë pas përfundimit të zgjedhjeve parlamentare të 11 Majit. Thuajse i gjithë potenciali i grupit u mobilizua në fushatën elektorale dhe nuk u pengua asnjë moment.
Nga aksioni policor i koduar “Ura”, nuk u mundësua arrestimi i kokave kryesore të këtij grupi kriminal dhe një pjesë e madhe e anëtarëve të tij. Të vetmit që ranë në pranga ishin avokati Armand Targaj, Altin Morina që ndodhej në burg, Akil Ndërjaku që ndodhej në burg, ish-polici Orgest Molla, Gëzim Thartori, Ligor Çombashi, Ervis Deti dhe dy persona të tjerë./OraNews
Discussion about this post