Flojera Davidhi është magjistratja e zgjedhur me short për të gjykuar ish-kryeministrin Sali Berisha.
Gjykata e Posaçme hodhi shortin për të caktuar trupën gjykuese për dosjen ‘Partizani’ sot në orën 09:00.
Në bazë të shortit, gjyqtarja e GJKKO-së Flojera Davidhi do të gjykojë dosjen “Partizani” për të cilën Sali Berisha akuzohet për korrupsion pasiv.
Në listën e 10 gjyqtarëve nuk u përfshi emri i Irena Gjokës, e cila ka qenë trupë gjykuese prej tetorit të vitit të kaluar ku ka miratuar edhe masat e sigurisë, ndërsa ligji përcakton se nuk duhet të jetë më pjesë e procesit.
Prokuroria e Posaçme, ditën e djeshme (15 Tetor) ka mbyllur hetimet për dosjen e privatizimit të ish-kompleksit Partizani, duke dërguar për gjykim Sali Berishën, dhëndrin e tij Jamarbër Malltezi, dy biznesmenët Fatmir Bektashi e Xhimi Begeja, si edhe noteren Andia Pustina.
Dosja tashmë i ka kaluar Gjykatës së Posaçme dhe Flojera Davidhi do duhet të vendosë nëse kalon ose jo për gjykim.
Ish-kryeministri Berisha është i pandehur për korrupsion pasiv dhe akuzohet se ka favorizuar dhëndrin e tij, Jamarbër Malltezi.
Discussion about this post