Pjesëtari i një prej bandave kriminale më të rrezikshme në vend, Laert Haxhia vazhdon të jetë në arrati. Ndërsa sot Gjykata e Posaçme ka nisur gjykimin në mungesë të tij, i akuzuar për vrasje dhe grup kriminal, akuza që lidhen me dy tentativa për vrasje të nipit të Aldo Bares dhe vrasjen e dyfishtë në Lushnjë të Zamir Latifit dhe Jurgen Hoxhës.
Gjykimi për Haxhian, i konsideruar një nga të shumëkërkuarit e drejtësisë, u pezullua me 1 vit për shkak të arratisë. Këtë të martë Gjykata e Posaçme do të mbaj seancën e parë për të, pavarësisht se ende Policia nuk ka bërë të mundur lokalizimin dhe arrestimin e tij.
Vrasja e dyfishtë
Ngjarja e rëndë nga vrasja e dyfishtë e dy të rinjve Jurgen Hoxha dhe Zamir Latifi në tetor të 2017, ka tronditur jo vetëm qytetin e Lushnjës, por edhe opinionin publik. Grupi hetimor ka dalë në përfundimin se vrasja e dyfishtë e të rinjve në Lushnje, ka qenë e mirëmenduar nga dy atentatorët, Laert Haxhiu dhe shoku i tij Orges Bilbili. Sipas grupit të hetimit, Laert Haxhiu fillimisht ka qëlluar në drejtim të tavolinës ku po qëndronin viktimat Latifi e Hoxha dhe i plagosuri Xhepaxhiu. Pasi i qëllon me breshëri automatiku dy të rinjtë, trupat e të cilëve u gjendën shumë pranë një automjeti tip “Fiat Punto” në pronësi të Xhulio Shkurtit, Haxhiu futet brenda lokalit. Ky ka qenë momenti ku shumë dëshmitarë okularë, kanë dalluar autorin e dyshuar të kësaj masakre, si Laert Haxhiu. Por ngjarja nuk përfundoi me kaq. 25-vjeçari, duke menduar se brenda lokalit gjenden pjesëtarët e tjerë të grupit, nxiton drejt tij. I dyshuari Laert Haxhiu sëbashku me mikun e tij Orges Bilbili kanë hyrë brenda lokalit, mesa duket me qëllimin për të vrarë Xhulio Shkurtin e Saimir Xhelilin. Në ato momentin Zamir Latifi, i cili kishte mbetur i plagosur ka qëlluar me pistoletë në drejtim të atentatorëve, por pa rezultat. Me të dalë nga lokali, si kundërpërgjigje, mbi trupin e Zamir Latifit dy autorët derdhën 35 plumba pohojnë hetuesit. Dëshmitarët saktësojnë se ngjarja mund të kishte marrë të tjera përmasa nëse nuk do të kishin mbaruar plumbat e automatikut të 25-vjeçarit Laert Haxhiu. Kamerat e sigurisë nuk kanë mundur të fiksojnë të gjithë ngjarjen, ndërsa krimi makabër ndodhi shumë pranë Komisariatit të Policisë Lushnje. Grupi hetimor i masakrës së Lushnjes bën me dije se tre kanë qenë autorët e kësaj ngjarje të rëndë. A.L/ gijotina.com
