Gjykata e Lartë ka vendosur të lënë në fuqi dënimin me 70 vite burg në total 9 persona, mes të cilëve edhe nipin e diktatorit Enver Hoxha, për atë që njihet si dosja Xibraka.
Pavarësisht se Ermal Hoxha e kreu dënimin, sikundër disa persona të tjerë të përfshirë në dosje, dhe tashmë kanë fituar lirinë, në dhomë këshillimi, Gjykata e Lartë vendosi të konsiderojë të drejtë vendimet e dhëna më parë nga gjykatat shqiptare.
Në këtë mënyrë, Gjykata e Lartë ka rrëzuar rekursin e depozituar mbi rrëzimin e vendimit të dhënë 6 vite më parë nga ish-Gjykata e Apelit të Krimeve të Rënda,
Kjo gjykatë dënoi me nga 6 vite e 8 muaj burg deri në 8 vite Ermal Hoxhën, Ilir Hysenin, Genci Xhixhën, Gentian Gjonajn, Kelmend e Arjan Dalipin dhe Saimir Batkun.
Me nga 8 vite burg u dënuan në atë kohë edhe dy kolumbianët, Cesar Avila e Valther Moreno, kimistë të cilët kishin mbërritur në shqipëri për të përzjerë kokainën.
Ata u shpallën fajtor për trafik narkotikësh në kuadër të grupit të strukturuar kriminal.
Grupi i drogës “Xibraka” u zbulua në fillim të janarit të vitit 2015, ku u sekuestrua 100 kg kokainë në një magazinë në fshatin Xibrakë 10 km larg qytetit të Elbasanit.
Hetimet nisën pas informacionit të përcjellë nga autoritetet gjermane. Lidhur me dosjen Xibraka ka pasur akuza politike nga ana e ish-Kryeministrit Sali Berisha, sipas të cilit i përfshirë në këtë aktivitet të paligjshëm ishte edhe vëllai i kryeministrit Edi Rama. Gjithsesi akuzat e Berishës kanë mbetur në nivelin e denoncimeve.
Discussion about this post