Deputeti demokrat Ervin Salianji ka reaguar për draftin e qeverisë për legalizimin e kanabisit në vend, duke u shprehur se kjo politikë ka sjellë pasoja tepër të rënda në gjendjen e kriminalitetit në Shqipëri.
Deputeti shkruan në “Facebook”, se ky projekt bashkë me projektin për amnistimin e parave të pista, e kthen Shqipërinë nën sovranitetin e plotë të kontigjentëve kriminalë, ndërsa shton se kryeministri Rama po ndjek një rrugë tjetër nga ajo e BE.
“Qeverisjen e Ramës më shumë se gjithçka e personifikon kanabisi dhe lidhja simbiotike me krimin! E mbronte me fanatizëm dhe me propogandë kanabizimin e Shqipërisë duke mohuar haptaz faktet e pakundërshtueshme që denonconim thuajse përditshëm. Tanimë qeveria po bën fakt ligjërimin e prodhimit të drogës dhe trafikimin lehtësisht ku në çdo rast gjoba parashikohet si dënimi më i ashpër! Kjo politikë e ndjekur ka sjellë pasoja tepër të rënda, në gjendjen e kriminalitetit në Shqipëri, ku përditë raportohen krime, vrasje, tritol! Kjo politikë ka bërë që sot afër shkollave më lehtësisht gjen kanabis se çokollata! Ky projekt bashkë me projektin për amnistimin e parave të pista e kthen Shqipërinë nën sovranitetin e plotë të kontigjentëve kriminalë! Ditën kur Bashkimi Europian angazhohet maksimalisht për të rrugën e Shqipërisë për çeljen e negociatave, Edi Rama dhe qeveria e tij nxjerrin për konsultim ligjin për kanabisin. Shqiptarët duan europën por Edi Rama ka tjetër rrugë”, shkruan Salianji.
Discussion about this post