Penallti të humbura. Gola nga dy dyja skuadrat. Veprime individuale fantastike dhe shumë vrull. Gjithçka që mund të ofrojë një sfidë spektakolare kishte takimi i sotëm mes Napolit dhe Milanit, i vlefshëm për fazën çerekfinale të Ligës së Kampionëve. Një dramë sportive që përfundoi në barazim 1-1, një rezultat ky që çoi në gjysmëfinale Milanin, që kishte triumfuar 1-0 në ndeshjen e parë.
Napoli e nisi në sulm, por ishin kuqezinjtë që patën shansin të kalonin në avantazh me anë të Giroud me një goditje nga 11 metra. Por francezi u ndal nga pika e bardhë nga ana e portierit të Napolit.
Gjithsesi, francezi që humbi këtë rast të pastër, e kishte të pamundur të gabonte pas një pasimi të Leaos që e nxorri sulmuesin me portën e zbrazur aty ku kuqezinjtë festuan në minutën e 43-të. Goli erdhi pas një inkursioni fantastik nga Leao, i cili e mori topin në gjysmëfushën e Milanit dhe depërtoi në zonën kundërshtare.
Në pjesën e dytë, napoletanët provuan me të gjitha mënyrat dhe e patën mundësinë më të mirë me anë të Kvaratskhelia. Por, gjeorgjiani gaboi nga pika e bardhë e penalltisë.
Në fund, Napoli shënoi me Osimhen, por goli ishte sa për statistikë me Milanin që kaloi më tej dhe pret në gjysmëfinale fituesin e çiftit Inter-Benfica.
Discussion about this post